हिवताप , डेंग्यूबाबत जनजागृती

शिवमंदिरांमध्ये हिवताप, डेंगीबाबत जनजागृती
नवी मुंबईतील श्रावणी सोमवारनिमित्त विशेष उपक्रम
नेरूळ, ता. ५ (बातमीदार) ः श्रावणी सोमवारनिमित्त नवी मुंबईतील शिवमंदिरात विशेष उपक्रम राबविण्यात आले. महापालिका आयुक्त डॉ. कैलास शिंदे यांच्या मार्गदर्शनानुसार आरोग्य विभागाच्या वतीने महापालिका क्षेत्रातील १७ शिवमंदिरांमध्ये हिवताप, डेंगी व साथीच्या आजारांबाबत आरोग्य शिबीरे आयोजित केली होती.
श्रावण महिना हा सण-उत्सवांचा महिना म्हणून ओळखला जातो. विशेषत्वाने श्रावणी सोमवारच्या दिवशी शिवमंदिरांमध्ये नागरिकांची मोठया प्रमाणावर गर्दी असते. त्यामुळे श्रावणी सोमवारच्या दिवशी शिवमंदिरांमध्ये आरोग्यविषयक शिबिरे आयोजित केल्यास नागरिकांमध्ये मोठया प्रमाणावर जनजागृती होईल हे लक्षात घेत शिवमंदिरांमध्ये हिवताप, डेंगी व साथीच्या आजारांबाबत आरोग्य शिबीरे आयोजित केली होती. या ठिकाणी आठ हजार ४१९ नागरिकांनी भेट देत प्रात्यक्षिकांसह माहिती जाणून घेतली. तर, १८५ नागरिकांचे रक्तनमुने तपासणीसाठी घेण्यात आले.
नवी मुंबईकर नागरिकांनी आरोग्य विभागामार्फत करण्यात येणाऱ्या डास प्रतिबंधात्मक व जनजागृतीसोबतच आपल्या घरातील व घराभोवतालची डासउत्पत्ती स्थाने नष्ट करण्याबाबत जागरुकता दाखवली तर शहरात हिवताप, डेंगी आजारावर आळा घालणे शक्य होईल. तरी त्यादृष्टीने नागरिकांनी याविषयी जागरुक राहून सहकार्य करावे, असे आवाहन पालिका आयुक्त डॉ. कैलास शिंदे यांच्या वतीने करण्यात येत आहे.