गणेशोत्सवापूर्वी पेंधरमधील रस्त्यांची दुरुस्ती करा

गणेशोत्सवापूर्वी पेंधरमधील रस्त्यांची दुरुस्ती करा
अतिरिक्त आयुक्त गणेश शेटे यांना शिवसेनेकडून निवेदन
खारघर, ता. ७ (बातमीदार) ः गणेशोत्सव अवघ्या काही दिवसांवर येऊन ठेपलेला असताना पेंधर फाटा ते गावाकडे जाणाऱ्या अंतर्गत रस्त्यांची दुरवस्था झाली आहे. या पार्श्वभूमीवर शिवसेना (ठाकरे गट) पदाधिकाऱ्यांनी पनवेल महापालिकेचे अतिरिक्त आयुक्त गणेश शेटे यांची भेट घेऊन येथील रस्त्यांची तातडीने डागडुजी करण्याची मागणी केली आहे.
पेंधर गावात सुमारे तीन हजारपेक्षा अधिक घरे असून बहुतांश कुटुंबांमध्ये गणेशोत्सव मोठ्या उत्साहात साजरा केला जातो. यानिमित्त घरोघरी बाप्पा विराजमान होतात आणि अनेक नातेवाईक, मित्रमंडळी दर्शनासाठी येतात; मात्र पेंधर फाट्यापासून गावापर्यंतचा रस्ता तसेच गावातील अंतर्गत रस्ते अत्यंत खराब स्थितीत असून जागोजागी मोठे खड्डे पडले आहेत. त्यामुळे गणेशोत्सवाच्या काळात वाहतुकीस अडथळा निर्माण होण्याची, तसेच दुर्घटनांचा धोका वाढण्याची शक्यता आहे. या पार्श्वभूमीवर अतिरिक्त आयुक्त शेटे यांना दिलेल्या निवेदनात तातडीने संबंधित विभागाच्या अधिकाऱ्यांना रस्त्यांची पाहणी करून योग्य उपाययोजना करण्याचे निर्देश द्यावेत, अशी मागणी शिवसेनेकडून करण्यात आली. तळोजा उपशहरप्रमुख देवेंद्र पाटील यांनी सांगितले, की अतिरिक्त आयुक्त गणेश शेटे यांनी रस्त्यांवरील खड्डे त्वरित बुजवण्याचे आदेश संबंधित अधिकाऱ्यांना दिले असून, गणेशोत्सवात रस्त्यावर पुन्हा खड्डे पडणार नाहीत, याची खबरदारी घेण्याचेही निर्देश दिले आहेत. या शिष्टमंडळात शिवसेना महानगरप्रमुख अवचित राऊत, युवासेना जिल्हा अधिकारी पराग मोहिते, नावडे-तळोजा उपशहरप्रमुख देवेंद्र पाटील आणि तळोजा शहर समन्वयक अभिमन्यू गोरे आदी पदाधिकारी सहभागी होते.