पेण खारेपाट भागात गढूळ पाणीपुरवठा

पेण-खारेपाट भागात गढूळ पाणीपुरवठा
साथीचे आजार पसरण्याची भीती; पाणी गाळून व उकळून पिण्याचे आवाहन
पेण, ता. ५ (वार्ताहर) : तालुक्यातील वाशी-खारेपाट भागासह येथील असंख्य वाड्या-वस्त्यांवर काही दिवसांपासून गढूळ पाणीपुरवठा होत आहे. यामुळे येथील नागरिकांचे आरोग्य धोक्यात येऊन साथीचे आजार पसरण्याची भीती निर्माण झाली आहे.
तालुक्यातील खारेपाट विभागात पाणीटंचाईचा प्रश्न आजतागायत सुटू शकलेला नाही. त्यामुळे पाण्यासाठी नागरिकांचे हाल होत असताना या पावसाळ्यातही शहापाडा धरणातून मातीमिश्रित गढूळ पाण्याचा पुरवठा होत आहे. यामुळे नागरिकांचे आरोग्य धोक्यात आले असून साथीचे आजार पसरण्याची भीती आहे. एकीकडे सर्वात मोठे हेटवणे धरण जवळपास पूर्ण क्षमतेने भरले असून त्याद्वारे शहापाडा धरणामध्ये येणारे पाणी मातीमिश्रित लाल आणि गढूळ येत आहे. त्यातच शहापाडा धरणातील साचलेला गाळ अनेक वर्षांपासून काढण्यात आलेला नसल्याने हे संपूर्ण गाळाने भरले आहे. त्यामुळे आपोआपच पाण्याची साठवण क्षमता कमी झाली आहे. तसेच, धरणावरील फिल्टरेशन प्लांटही बंद आहेत. त्यामुळे संबंधित पाणीपुरवठा विभागाने पाणीपुरवठा हा सुरळीत आणि स्वच्छ करावा, अशी मागणी येथील नागरिकांनी केली आहे.

खारेपाट विभागातील पाण्याचे नमुने आम्ही घेतले असून ते तपासणीसाठी पाठविण्यात आले आहे. त्याचा अहवाल चार दिवसांनी येणार आहे; परंतु आपल्या आरोग्याच्या दृष्टिकोनातून नागरिकांनी पाणी उकळून व गाळून प्यावे.
- डॉ. मनीषा म्हात्रे, वैद्यकीय अधिकारी

पावसाचे दिवस असल्याने धरणातून मातीमिश्रित पाणीपुरवठा होत आहे; मात्र पाण्यामध्ये टीसीएल पावडर टाकली जाते. लवकरच पाणीपुरवठा सुरळीत आणि शुद्ध होईल.
- आर. एम. राठोड, अधिकारी, ग्रामीण पाणीपुरवठा