दुभाजकातील सौंदर्य हरवतेय

अंबरनाथ, ता. ५ (बातमीदार) : पावसाळा सुरू झाला की ''झाडे लावा, त्यांचे संगोपन करा'' असे आवाहन सातत्याने करण्यात येते. मात्र, अंबरनाथ नगरपालिका कार्यालयासमोरील रस्त्याच्या मध्यभागी लावलेली शोभेची झाडे आणि वेली यांची देखभाल न झाल्याने त्या झाडांची दयनीय अवस्था झाली आहे.
रेल्वे स्थानक परिसरातून पालिका कार्यालयापर्यंत स्कायवॉकच्या खाली आणि कल्याण-बदलापूर महामार्गाच्या दुभाजकामध्ये लावण्यात आलेली झाडे अनेक ठिकाणी निगा न राखल्यामुळे मरणावस्थेत आली आहेत. काही ठिकाणी तर झाडांना आधारासाठी बसवलेल्या टाईल्सही उखडल्या आहेत. फेरीवाल्यांचा त्रास आणि अनधिकृत पार्किंग टाळण्यासाठी रस्त्याच्या मधोमध उंचीवर शोभेची झाडे लावण्यात आली होती. परंतु त्या झाडांची छाटणी न झाल्यामुळे त्याच्या फांद्या रस्त्याच्या दिशेने वाढून वाहनचालकांना अडथळा ठरत आहेत. काही ठिकाणी तर झाडांचे मूळसुद्धा उघडे पडले आहेत. झाडांना पाण्याची सुविधाही नाही. दुभाजकांत लावलेल्या शोभेच्या झाडांची छाटणी केली नसल्याने फांद्या बेसुमार वाढल्या आहेत. प्रशासनाने त्यांची योग्य निगा आणि देखभाल ठेवण्याची मागणी पर्यावरण प्रेमींकडून होत आहे.

नगरपालिका कार्यालय ते रेल्वेस्थानक परिसरात रस्त्याच्या मध्यभागी लावलेल्या शोभेच्या झाडांची निगा आणि देखभाल करण्याबाबत मुख्याधिकारी उमाकांत गायकवाड यांनी नुकत्याच आवश्यक त्या सूचना दिल्या आहेत. त्यानुसार कार्यवाही केली जाणार आहे. अधिकाऱ्यांनाही त्याबाबत सांगण्यात आले आहे. कल्याण-बदलापूर रस्त्याच्या मध्यभागी असलेल्या झाडांची निगा राखण्याबाबत लवकरच उचित कार्यवाही केली जाईल.
- नवनीत देवरे, उद्यान विभागप्रमुख, अंबरनाथ
-----------------