मेट्रो पुलावरून कोसळलेल्या सळई प्रवाशांच्या डोक्यात शिरली

मेट्रो पुलावरून कोसळलेल्या सळई प्रवाशांच्या डोक्यात शिरली

भिवंडी, ता. ५ (वार्ताहर) : शहरात मंगळवारी दुपारी दोन वाजताच्या सुमारास एक विचित्र अपघाताची घटना घडली. नारपोली ते धामणकर नाका या दरम्यान ठाणे-भिवंडी या मेट्रो मार्गाच्या पहिल्या टप्प्यातील काम सुरू आहे. हे काम सुरू असताना मेट्रो पुलावरून एक लोखंडी सळई खाली रस्त्यावरून जाणाऱ्या रिक्षाच्या आरपार जाऊन प्रवाशाच्या डोक्यात शिरली. या अपघाताने प्रवासी रक्तबंबाळ झाला असून, या गंभीर दुखापतीनंतरही तो शुद्धीत राहिला आहे.

सोनू अली (वय २०, रा. विठ्ठलनगर) असे जखमी युवकाचे नाव आहे. स्थानिकांच्या मदतीने सोनूला अंजूरफाटा येथील खासगी रुग्णालयात दाखल करण्यात आले. ठाणे-भिवंडी-कल्याण मेट्रो प्रकल्प ५ अंतर्गत पहिल्या टप्प्यातील काम जवळजवळ ८० टक्के पूर्ण झाले आहे. हे काम सुरुवातीपासूनच रखडत सुरू राहिल्याने या कामामुळे स्थानिकांना वाहतूक कोंडीचा सामना करावा लागत आहे. त्यातच वर्दळीच्या वेळीही काम सुरू असल्याने या वाहतूक कोंडीत भर पडत आहे. त्यातच आता पुलावर सुरू असलेली लोखंडी सळई खाली रस्त्यावरून जाणाऱ्या रिक्षाच्या आरपार जाऊन प्रवाशाच्या डोक्यात शिरल्याची घटना मंगळवारी (ता. ५) दुपारी घडली. या घटनेत सोनू अली हा गंभीर जखमी झाला असून, त्याच्यावर उपचार सुरू आहेत. दरम्यान, हा अपघात कोणाच्या चुकीमुळे व कसा घडला, याबाबत अधिक तपास भोईवाडा पोलिस करीत आहेत. यापूर्वी अंजूरफाटा येथील एक बांधकाम सुरू असलेला मोठा पिलर कोसळून झालेल्या अपघातात चार कामगार जखमी झाले होते.