तरणतलावातील मुलाचा मृत्यू हलगर्जीमुळे

तरण तलावातील मुलाचा मृत्यू हलगर्जीमुळे
पाच लाखांची नुकसानभरपाई देण्याचे कंत्राटदाराला आदेश

भाईंदर, ता. ५ (बातमीदार) : मिरा-भाईंदर महापालिकेच्या क्रीडासंकुलातील तरण तलावात चार महिन्यांपूर्वी एका अकरा वर्षीय मुलाचा मृत्यू कंत्राटदाराने नियुक्त केलेल्या जीवरक्षकांच्या हलगर्जीमुळेच झाल्याचे स्पष्ट झाले आहे. महत्त्वाचे म्हणजे या जीवरक्षकांनी शासनमान्य संस्थेकडून प्रशिक्षणदेखील घेतले नसल्याचे उघड झाले आहे. त्यामुळे कंत्राटदाराने मुलाच्या पालकांना पाच लाख रुपयांची नुकसानभरपाई देण्याचे आदेश नुकतेच आयुक्त राधाबिनोद शर्मा यांनी दिले.

क्रीडासंकुलाच्या तरण तलावात एप्रिलमध्ये कंत्राटदाराने आयोजित केलेल्या उन्हाळी शिबिरात ग्रंथ मुथा या मुलाचा बुडून मृत्यू झाला होता. हे क्रीडासंकुल साहस चॅरिटेबल ट्रस्ट या कंत्राटदाराच्या माध्यमातून चालविण्यात येत होते. या घटनेनंतर आयुक्तांनी चौकशीचे आदेश दिले होते. चौकशी समितीने घटनेचा अहवाल आयुक्त राधाबिनोद शर्मा यांच्याकडे सादर केला. या अहवालानुसार तरण तलावासाठी नियुक्त प्रशिक्षकांनी शासनमान्य महाराष्ट्र ॲमेच्युअर स्विमिंग असोसिएशन यांच्याकडून जीवरक्षकाचे प्रशिक्षण घेणे बंधनकारक होते; मात्र कंत्राटदाराने नियुक्त केलेल्या जीवरक्षकांनी हे प्रशिक्षण घेतले नाही. ही दुर्घटना नवघर पोलिसांनी जीवरक्षकांचा हलगर्जी व निष्काळजीमुळेच झाल्याचे महापालिकेला कळवले. त्यातच कंत्राटदाराने उन्हाळी शिबिराबाबत कोणतीही परवानगी महापालिकेकडून घेतली नाही. तसेच कंत्राटदार सभासदांकडून जास्ती दराचे शुल्क घेत असल्याचीही माहिती पुढे आली आहे.

चौकशी समितीच्या निष्कर्षांवरून आयुक्त राधाबिनोद शर्मा यांनी मुलाच्या पालकांना पाच लाख रुपयांची नुकसानभरपाई देण्याचे आदेश कंत्राटदाराला दिले आहेत. ही रक्कम कंत्राटदाराच्या महापालिकेकडे असलेल्या सुरक्षा अनामत रकमेतून कापून ती पालकांना दिली जाईल. येत्या पंधरा दिवसांत क्रीडासंकुल सर्वांसाठी खुले केले जाईल; मात्र पोलिस तपास पूर्ण होईपर्यंत तरण तलावाची सुविधा बंद ठेवण्यात येईल व त्यानंतर ही सेवा महापालिकेच्या माध्यमातून चालविण्यात येईल, असेही आदेश शर्मा यांनी दिले.