लाडक्या बहिणीसाठी तेजस्विनी धावली...

लाडक्या बहिणीसाठी तेजस्विनी धावली...
तुर्भे, ता. ५ (बातमीदार) : मागील काही वर्षापासून बंद असलेली तेजस्विनी महिला स्पेशल बस अखेर लाडक्या बहिणीसाठी शहरातील तीन मार्गांवर सुरु झाली आहे. गर्दीच्या वेळी लाडक्या बहिणीचा प्रवास सुरक्षित व्हावा यासाठी परिवहन उपक्रमाकडून खास महिला स्पेशल तेजस्विनी बस सुरू केली होती. मात्र, काही कारणास्तव काही वर्ष ही बससेवा बंद करण्यात आली होती. मात्र पुन्हा ही बससेवा लाडक्या बहिणींसाठी सुरु करण्यात आली आहे.
राज्य शासनाने महिलांच्या सन्मानार्थ परिवहन विभागाच्या अंतर्गत तेजस्विनी बस उपक्रम राज्यभरात राबविला. या उपक्रमाचा एक भाग म्हणून नवी मुंबई महानगरपालिका परिवहन उपक्रमाकडून सन २०१९ मध्ये नवी मुंबई शहरातील महिलांच्या दैनंदिन प्रवासाच्या सुरक्षिततेच्या व सुलभतेच्या दृष्टीकोनातून एकूण १० विशेष तेजस्विनी महिला बस परिवहन विभागाच्या ताफ्यात दाखल करण्यात आल्या होत्या. परंतु, अल्पावधीतच या बसेस बंद झाल्या होत्या.
त्यानंतर मागील ८ मार्च रोजीच्या महिला दिनाचे औचित्य साधून बहिणींना भेट म्हणून महिलांसाठी विशेष तेजस्विनी बसेस सुरू व्हाव्यात यासाठी काही सामाजिक कार्यकर्त्यांकडून परिवहन प्रशासनाकडे पाठपुरावा केला होता. तरीही ही बस सेवा सुरु करण्यात आलेली नव्हती. विशेष म्हणजे या बसेस फक्त महिलांसाठी असून आणि त्यांना सुरक्षित प्रवास मिळावा यासाठी त्या सुरू केल्या आहेत. आता ही बससेवा पुन्हा सुरु करण्यात आली आहे.

वेळापत्रक
गेल्या महिनापासून तेजस्विनी बस सुरु करण्यात आल्या असून सकाळी ८ ते ११ वाजेपर्यंत त्यानंतर सायंकाळी ४ ते ८ वाजेपर्यंत फक्त महिलासाठी ही बस सुरु केली आहे.
घणसोली घरोदा ते वाशी स्टेशन नंबर ९
५० - घणसोली घरोदा ते पनवेल
२३ - आर्टिस्ट व्हिलेज ते खरकोपर

गेल्या महिन्यापासून तेजस्विनी बस सुरु झाली असून ही बस पनवेलपर्यंत धावणार आहे. स्पेशल महिलांसाठी बससेवा सुरु करण्यात आली आहे.
- योगेश कडूस्कर, व्यवस्थापक, एनएमएमटी परिवहन उपक्रम