रेल्वेमार्गे दारू तस्करांचा भांडाफोड

रेल्वेमार्गे दारू तस्करांचा भांडाफोड
पनवेल रेल्वे पोलिसांकडून तिघांवर कारवाई
पनवेल, ता. ५ (वार्ताहर) : महाराष्ट्रात दारू महाग झाल्याने अनेकांना गोव्यातून स्वस्त दारू आणण्याचा मोह झाला आहे; मात्र रेल्वे पोलिसांनी अशा प्रवाशांवर वॉच ठेवून रेल्वेमार्गे दारू तस्करांची धरपकड सुरू केली आहे.
पनवेल रेल्वे पोलिस ठाण्यातील अंमलदार सोमवारी (ता. ४) पहाटे पाचच्या सुमारास पनवेल रेल्वेस्थानकावर गस्त घालत होते. या वेळी फलाट क्रमांक पाचवर आलेल्या मत्स्यगंधा एक्स्प्रेसमधून उतरलेल्या महेंद्र राधडिया (३७), चंदन राजभर (२६) व मोहम्मद शेख (३८) या तीन प्रवाशांच्या हालचाली संशयास्पद वाटत होत्या. पोलिसांनी त्यांच्याकडे चौकशी केली असता त्यांनी उडवाउडवीची उत्तरे देण्यास सुरुवात केली. त्यामुळे पोलिसांनी तिघांना ताब्यात घेऊन बॅगेची तपासणी केली असता ३२ हजारांचा बेकायदा दारूचा साठा पोलिसांनी जप्त केला आहे.
-----------------------------
स्वस्त दारू पडली महागात
महाराष्ट्रात दारू महाग झाल्याने अनेक प्रवासी गोव्यातून स्वस्त दारू आणण्याचा प्रयत्न करतात; मात्र ‘फॉर सेल इन गोवा ओन्ली’ असे लिहिलेल्या मद्याच्या बाटल्या इतर राज्यात विक्री करता येत नाहीत. अशा मद्याच्या बाटल्या बाळगणे किंवा वाहतूक करणे कायद्याने गुन्हा आहे. पनवेल रेल्वे पोलिस ठाण्याचे पथक तसेच आरपीएफ जवानांकडून सध्या रेल्वेस्थानकावर गस्त घालण्यात येत असून संशयास्पद प्रवाशांवर लक्ष ठेवले जात आहे. त्यामुळे रेल्वेमार्गे दारू आणणे महागात पडू शकते.