बेलापूरमधील प्रस्तावित रुग्णालयाच्या जागेची कांदळवन विभागाकडून पाहणी

बेलापूरमधील प्रस्तावित रुग्णालयाच्या जागेची कांदळवन विभागाकडून पाहणी

तुर्भे, ता. ५ (बातमीदार) : नवी मुंबई महापालिकेच्या बेलापूरमधील प्रस्तावित ५०० खाटांच्या सुपरस्पेशालिटी रुग्णालय आणि पदव्युत्तर वैद्यकीय महाविद्यालयाच्या जागेची सोमवारी (ता. ४) कांदळवन विभागाच्या वतीने पाहणी करण्यात आली. ही जागा पन्नास मीटरच्या बफर झोनमध्ये आहे की नाही, याबाबत खातरजमा करण्यासाठी ही पाहणी करण्यात आली.
कांदळवन विभागाच्या अहवालावर या जागेवर रुग्णालय उभारायचे की नाही, हे निश्चित होणार आहे. या प्रकरणावर नवी मुंबईतील भाजपअंतर्गत राजकारण तापले असून आमदार मंदा म्हात्रे व वनमंत्री गणेश नाईक यांच्यात शीतयुद्ध सुरू असल्याची चर्चा आहे. दरम्यान, कांदळवन विभागाचे विभागीय अधिकारी डी. पी. खाडे यांनी जिल्हाधिकारी, सिडको, महापालिका तसेच भूमापन अधिकाऱ्यांना संबंधित दस्तऐवजासह पाहणीसाठी बोलवले होते. त्यानुसार महापालिकेच्या अधिकाऱ्यांनी ही जागा त्यांना दाखवली. ही जागा बफर झोनमध्ये आहे का, इथे बांधकाम करणे शक्य आहे का, याची चाचपणी वन विभाग, कांदळवन विभागाने केली. या वेळी महापालिकेच्या मालमत्ता विभागाचे अधिकारी, सिडकोचे अधिकारी, वन विभाग, कांदळवन कक्षाचे अधिकारी आणि महसूल विभागाचे अधिकारीही उपस्थित होते.