येमेनमधून आश्रयाला आलेल्या वृद्धेचा अंध मुलगा बेपत्ता!

येमेनमधून आश्रयाला आलेल्या वृद्धेचा अंध मुलगा बेपत्ता!

ठाणे शहर, ता. ५ : अनेक देशांच्या हल्ल्यात बेचिराख झालेल्या येमेन देशामधील वृद्ध महिलेने तिच्या अंध मुलासह ठाण्यातील महागिरी येथे आश्रय घेतला; मात्र गेल्या २८ दिवसांपासून तिचा मुलगा येथून बेपत्ता झाला असून अज्ञाताकडून त्याच्या सुटकेसाठी १० लाखांची मागणी केली जात आहे. याची माहिती तिने ठाणेनगर पोलिसांना दिली असता पोलिसांनी हा बनावट कॉल असल्याचे सांगत मुलगा हरवल्याची तक्रार नोंदवून घेतली आहे.

मुंबईतील ऑर्थर रोड परिसरात जन्म झालेली मल्लेका हिने येमेन देशातील नागरिकासोबत लग्न करून तिथेच स्थायिक झाली होती. गेल्या ४५ वर्षांपासून ती तेथे राहत आहे. तिला दोन मुले आणि एक मुलगी आहे. तिच्या पतीने तिला घटस्फोट दिल्यानंतर तेथील युद्धाला घाबरून वर्षभरापूर्वी ती येमेन सोडून अंध मुलाला घेऊन ठाण्यात आली; परंतु ७ जुलैपासून तिचा मुलगा परहाना गुलाम मोहम्मद (वय ४०) हा घरातून बेपत्ता झाला आहे. तिने केलेल्या तक्रारीनुसार तिच्या मोबाईलवर एका अज्ञाताने फोन करून मुलगा जिवंत हवा असेल तर १० लाख रुपयांची मागणी केली. याची माहिती तिने ठाणेनगर पोलिसांना दिली; मात्र पोलिसांनी हा बनावट कॉल म्हणत त्याकडे दुर्लक्ष करून १७ जुलैला परहाना हरवल्याची नोंद करून घेतली आहे. मुलाला शोधण्याकरिता पोलिसांकडून सहकार्य मिळत नसल्याचा आरोपही मल्लेकाने केला आहे. तिने आता भारतातील येमेन देशाच्या राजदूताशी संपर्क साधून मुलाला शोधण्यासाठी मदत मागितल्याचे सांगितले.