साजिद शेख हत्येप्रकरणी आणखी दोघे अटकेत

साजिद शेख हत्येप्रकरणी आणखी दोघे अटकेत

उल्हासनगर, ता. ५ (वार्ताहर) : साजिद शेख हत्येप्रकरणी तपासाला गती देत उल्हासनगर पोलिसांनी आणखी दोन आरोपींना अटक केली आहे. विशाल बेरभैया, दिनेश जाधव अशी आरोपींची नावे असून, त्यांना न्यायालयाने पोलिस कोठडी सुनावली आहे. यापूर्वी दोन आरोपींना अटक करण्यात आले असून, आतापर्यंत चार जणांच्या मुसक्या आवळण्यात पोलिसांना यश आले आहे; मात्र या हत्येप्रकरणी अजूनही पाच आरोपी फरार असून त्यांचा शोध सुरू असल्याचे पोलिसांनी सांगितले. पोलिसांनी या प्रकरणात शेकडो सीसीटीव्ही फुटेज तपासले असून तांत्रिक तपासाच्या माध्यमातून आरोपींची ओळख पटवली. आरोपींनी गुन्हा घडवून आणल्यानंतर वेगवेगळ्या दिशांनी पळ काढल्याचे सीसीटीव्ही फुटेजमध्ये निदर्शनास आले; त्यामुळे आरोपींचा मागोवा घेणे आव्हानात्मक होते. त्यातच मृत साजिद शेखच्या कुटुंबीयांनी केवळ दोनच आरोपींना अटक करून पोलिस प्रकरण दाबण्याचा प्रयत्न करीत असल्याचा आरोप केला होता; मात्र पोलिसांनी संयम राखत आतापर्यंत चार आरोपींना अटक केली आहे तर उर्वरित पाच फरार आरोपींचा शोध सुरू आहे.