दहशतवाद कनेक्शन बदलापूरपर्यंत!

दहशतवाद कनेक्शन बदलापूरपर्यंत!

बदलापूर, ता. ५ (बातमीदार) : दहशतवादाचा तळ म्हणून ठाणे जिल्ह्यातील मुंब्रा आणि भिवंडी या दोन शहरांची नावे पुढे येत असताना, आता बदलापुरात डॉक्टर म्हणून सेवा देणाऱ्या ओसामा शेख (वय ३०) याला उत्तर प्रदेश ‘एटीएस’ने ताब्यात घेतले आहे. यामुळे बदलापुरात विविध चर्चांना उधाण आले आहे.

ओसामा शेख याला रविवारी (ता. ३) सायंकाळी स्पंदन रुग्णालयातून उत्तर प्रदेश ‘एटीएस’ने ताब्यात घेतले. या वेळी पोलिसांकडे ओसामा शेख याचे दहशतवादी संघटनेशी संबंध असल्याचे काही पुरावे मिळाल्याने त्याला उल्हासनगर न्यायालयात हजर करून ट्रान्सिस्ट रिमांड घेण्यात आली. ओसामाला पुढील चौकशीसाठी उत्तर प्रदेश येथे नेण्यात आले आहे. ओसामाने ‘बीएचएमएस’ ही वैद्यकीय शास्त्रातील पदवी धारण केली असून, तो कुटुंबीयांसह बदलापूर गाव या ठिकाणी वास्तव्यास होता. आई-वडील, पाच बहिणी आणि एकुलता एक भाऊ म्हणजेच ओसामा असे त्याचे कुटुंब आहे. बीएचएमएस पदवी घेतल्यानंतर डॉक्टरी पेशाचा सराव करण्यासाठी गेल्या वर्षभरापासून तो बदलापूर पूर्वेकडील स्पंदन रुग्णालयात सेवा बजावत आहे. जिद्दी व चिकाटीने अभ्यास करून त्याने डॉक्टरकीची परीक्षा उत्तीर्ण केल्याचे त्याच्या निकटवर्तीयांनी आणि रुग्णालयातील डॉक्टरांनी सांगितले. रुग्णालयाचे व्यवस्थापक डॉ. विनायक कुबल यांच्याशी चर्चा केली असता त्यांनी सांगितले, ‘रुग्णालयातील निवासी डॉ. जयवंत जमदाडे यांनी ओसामाला सहकारी डॉक्टर म्हणून ठेवले होते.’ तो फिजिशियनचा अभ्यासक्रम पूर्ण करीत असून, त्यानंतर तो अमेरिकेला नोकरीसाठी जाणार असल्याचे ओसामाने आम्हाला सांगितल्याचे इथल्या डॉक्टरांनी सांगितले. उत्तर प्रदेश ‘एटीएस’ची कारवाई धक्कादायक होती, अशी प्रतिक्रियाही विनायक कुबल यांनी दिली.