चर्चगेट-विरार दरम्यान १४ ठिकाणी वेगमर्यादा शिथिल; लोकल सेवा अधिक जलद होणार

लोकल सेवा अधिक जलद होणार
चर्चगेट-विरारदरम्यान १४ ठिकाणी वेगमर्यादा शिथिल
सकाळ वृत्तसेवा
मुंबई, ता. ५ : चर्चगेट ते विरारदरम्यान पश्चिम रेल्वेने १४ ठिकाणी लोकलच्या वेगमर्यादा शिथिल केल्या आहेत. २४ एप्रिल ते २५ जुलैदरम्यान या मर्यादांमध्ये बदल करण्यात आला आहे. यामुळे लोकल गाड्यांचा सरासरी वेग वाढणार असून, प्रवाशांना आपले नियाेजित ठिकाण वेळेवर गाठता येणार आहे.
रेल्वे मार्गांवर दुरुस्ती, तांत्रिक कामे, हवामानाशी संबंधित कारणांमुळे गाड्यांच्या वेगावर निर्बंध घालावे लागतात. या वेगमर्यादा ३० ते ५० किलोमीटर प्रति तासादरम्यान असतात. मात्र यामुळे लोकल गाड्यांचा वेग कमी होतो आणि वेळापत्रकावर परिणाम होतो. पश्चिम रेल्वेच्या हद्दीत माटुंगा-माहीम, माहीम-वांद्रे, सांताक्रूझजवळ, अंधेरी यार्डमध्ये, जोगेश्वरी-गोरेगाव आणि नायगाव-नालासोपारा या मार्गांवर वेगमर्यादा यापूर्वी लागू करण्यात आल्या होत्या. त्यातील १४ मर्यादा शिथिल करण्यात आल्याने सध्या चर्चगेट ते विरारदरम्यानचा प्रवास दोन मिनिटांनी लवकर होणार आहे.
.........
रेल्वे मार्गांवरील सरासरी वेग
 मुंबईतील उपनगरीय रेल्वे मार्गात लाेकलच्या वेगावर विविध कारणांमुळे मर्यादा घातल्या जातात. त्यामुळे धीम्या मार्गावरील सरासरी वेग ३५ किलोमीटर प्रतितास तर जलद मार्गावर हा वेग ४० ते ५० किलोमीटरपर्यंत असतो. मात्र धोकादायक किंवा दुरुस्तीनुसार संवेदनशील ठरलेल्या टप्प्यावर लोकलचा वेग ३० किलोमीटर प्रति तास किंवा त्यापेक्षाही कमी करण्यात येतो.