धम्मप्रसारक अविनाश कांबळे यांची रिपब्लिकन पक्षाच्या महाराष्ट्र प्रदेश उपाध्यक्षपदी नियुक्ती

अविनाश कांबळे यांची रिपब्लिकन पक्षाच्या
महाराष्ट्र प्रदेश उपाध्यक्षपदी नियुक्ती
सकाळ वृत्तसेवा
मुंबई, ता. ५ : बौद्ध धम्म चळवळीतील कार्यकर्ते आणि युनायटेड बुद्धिस्ट फेडरेशनचे संस्थापक अध्यक्ष अविनाश कांबळे यांची रिपब्लिकन पक्षाच्या महाराष्ट्र प्रदेश उपाध्यक्षपदी नियुक्ती करण्यात आली आहे. या नियुक्तीची अधिकृत घोषणा रिपब्लिकन पक्षाचे राष्ट्रीय अध्यक्ष तथा केंद्रीय सामाजिक न्याय राज्यमंत्री रामदास आठवले यांनी केली.
धम्म चळवळीचा प्रसार करणारे कांबळे जागतिक स्तरातील धम्म परिषदांमध्ये सहभाग नोंदवत असतात. त्यांनी वर्ल्ड फेलोशिप ऑफ बुद्धिस्ट्स या जागतिक संघटनेच्या स्थायी समितीवर उपाध्यक्ष म्हणून, तर २००६ साली महालक्ष्मी रेसकोर्स, मुंबई येथे ऐतिहासिक धम्म दीक्षा सुवर्ण महोत्सवाचे संयोजन पार पाडले. आता राजकीय क्षेत्रात सक्रिय होण्याचा निर्णय कांबळे यांनी घेतला आहे. रामदास आठवले यांच्या नेतृत्वावर माझा पूर्ण विश्वास असून, त्यांनी दिलेली जबाबदारी मी सार्थ ठरवेन, असे भावनिक उद्गार कांबळे यांनी नियुक्ती स्वीकारताना काढले. या नियुक्तीनंतर रिपब्लिकन पक्षाचे महाराष्ट्र प्रदेशाध्यक्ष राजा सरवदे, राज्य कार्याध्यक्ष बाबुराव कदम आणि राज्य सरचिटणीस गौतम सोनवणे यांनी अविनाश कांबळे यांचे अभिनंदन केले.