म्हाडाच्या संभाजीनगर मंडळाच्या १३२३ घरांच्या लॉटरीसाठी मुदतवाढ

म्हाडाच्या संभाजीनगर मंडळाची साेडत
ऑनलाइन नाेंदणी अर्ज, घरांच्या लॉटरीसाठी मुदतवाढ
सकाळ वृत्तसेवा
मुंबई, ता. ५ : म्हाडाचा विभागीय घटक असलेल्या छत्रपती संभाजीनगर मंडळाच्या अखत्यारीत काही भूखंड येतात. त्यावरील विविध गृहनिर्माण योजनेअंतर्गत एक हजार ३२३ निवासी सदनिका व १८ भूखंडांची ऑनलाइन संगणकीय सोडतीद्वारे विक्री केली जाणार आहे. त्यानुसार अर्ज करण्याची मुदत संपल्याने म्हाडाने नोंदणी आणि अर्ज भरणा प्रक्रियेला ३१ ऑगस्ट २०२५पर्यंत मुदतवाढ दिली आहे.
छत्रपती संभाजीनगर मंडळातर्फे सोडत तीन घटकांमध्ये विभागण्यात आली आहे. यामध्ये प्रधानमंत्री आवास योजना (शहरी)अंतर्गत एक हजार १४८ सदनिका, म्हाडा गृहनिर्माण योजनेअंतर्गत १५४ सदनिका, २० टक्के सर्वसमावेशक योजनेअंतर्गत २१ सदनिका व १८ भूखंडांचा समावेश आहे. संगणकीय सोडतीसाठी एकात्मिक गृहनिर्माण सोडत व्यवस्थापन प्रणाली व ॲपवर सदनिकांच्या अर्ज नोंदणी व अर्ज सादर करण्याच्या प्रक्रियेला म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल यांच्या हस्ते प्रारंभ करण्यात आला होता. सोडतीत सहभाग घेण्याकरिता रविवारी (ता. ३१) रात्री ११.५९ वाजेपर्यंत ऑनलाइन अर्ज सादर करता येणार असल्याचे म्हाडाने स्पष्ट केले आहे.