वीज ग्राहकांची माहिती आता सुरक्षित राहणार

वीज ग्राहकांची माहिती सुरक्षित राहणार
सायबरच्या मार्गदर्शक तत्त्वांनुसार संकेतस्थळात बदल
सकाळ वृत्तसेवा
मुंबई, ता. ५ : सायबर सुरक्षितता आणि वीज ग्राहकांची माहिती गोपनीय ठेवण्याकरिता महावितरणने आता कंबर कसली आहे. त्यानुसार लघुदाब वर्गवारीच्या वीजबिलाची पीडीएफ प्रत अधिकृत संकेतस्थळावरून ऑनलाइन डाऊनलोड करण्यासाठी संबंधित ग्राहकाला नोंदणीकृत प्रवेश (लॉगिन) करणे बंधनकारक असणार आहे. केंद्र शासनाच्या सायबर सुरक्षेच्या मार्गदर्शक तत्त्वानुसार हा बदल करण्यात आला आहे.
महावितरणच्या www.mahadiscom.in या अधिकृत संकेतस्थळावरील ‘वीजदेयक अवलोकन अथवा भरणा पेजवर लघुदाब वर्गवारीतील घरगुती, व्यावसायिक, औद्योगिक व इतर ग्राहकांना चालू महिन्याच्या वीजबिलाची पीडीएफ प्रत डाऊनलोड करण्याची सोय उपलब्ध करून देण्यात आली. याआधी केवळ १२ अंकी ग्राहक क्रमांकावर वीजबिल प्राप्त हाेत हाेते, परंतु त्याचा अनेकदा गैरवापर होत असल्याचे निदर्शनास आल्याने महावितरणने केलेल्या नव्या बदलानुसार विजबिलाच्या प्रतीसाठी नोंदणीकृत प्रवेश करणे बंधनकारक असेल. तर ग्राहकांना फक्त वीजबिल नोंदणीकृत प्रवेशाविना ऑनलाइन भरता येणार आहे.