मल्टिप्लेक्समध्ये मराठी चित्रपटांना अतिरिक्त खेळ मिळण्यासाठी समिती

मल्टिप्लेक्समध्ये मराठी चित्रपटांना
अतिरिक्त खेळ मिळण्यासाठी समिती
उपमुख्यमंत्री एकनाथ शिंदे यांची घोषणा
सकाळ वृत्तसेवा
मुंबई, ता. ५ : मल्टिप्लेक्समध्ये मराठी चित्रपटांना अतिरिक्त शोज मिळवून देण्यासह या प्रश्नावर कायमस्वरूपी तोडगा काढण्यासाठी समिती स्थापन करण्याचे आदेश उपमुख्यमंत्री एकनाथ शिंदे यांनी दिले. समितीने दीड महिन्यात शासनाला अहवाल सादर करावा, असे आदेश उपमुख्यमंत्र्यांनी या वेळी दिले.
मराठी चित्रपटांना मिळणाऱ्या कमी स्क्रीन, ऐनवेळी खेळाच्या वेळा बदलणे तसेच कोणतीही पूर्वकल्पना न देता तीन दिवसांत चित्रपट उतरवणे, आठवडाभराचे शुल्क घेऊन उर्वरित रक्कम परत न करणे, तसेच चित्रपटाला संमती देण्यासाठी सेन्सॉर बोर्डाला विनंती करणे आदी प्रश्नांबाबत मराठी चित्रपटांचे निर्माते, वितरक आणि विविध पक्षांच्या सिने कर्मचारी संघटनांसमवेत उपमुख्यमंत्री एकनाथ शिंदे यांच्या पुढाकाराने मंत्रालयात बैठक झाली. या वेळी शिंदे यांनी उपस्थितांचे म्हणणे ऐकून घेतले. या प्रश्नावर कायमस्वरूपी उपाययोजना करण्यासाठी समिती स्थापन करण्याचा निर्णय शिंदे यांनी घेतला. समितीचे अध्यक्ष गृह विभागाचे अपर मुख्य सचिव असून, प्रधान सचिव अपील आणि सुरक्षा, प्रधान सचिव नगरविकास दोन, सांस्कृतिक कार्य विभागाचे सचिव, परिवहन सचिव, मराठी सिनेमांचे निर्माते, वितरक, मल्टिप्लेक्स मालक, फिल्मसिटी अधिकारी, चित्रपट महामंडळाचे प्रतिनिधी, निर्माते महामंडळाचे प्रतिनिधी यांचा समावेश असेल. येत्या दीड महिन्यात समिती अहवाल सादर करणार असून, त्यानंतर याबाबत शासन अंतिम निर्णय घेईल, असे उपमुख्यमंत्र्यांनी या वेळी सांगितले.