के. आ. बांठिया विद्यालयाला आयएसओ मानांकन

के. आ. बांठिया विद्यालयाला आयएसओ मानांकन
नवी मुंबई : सुधागड एज्युकेशन सोसायटीच्या नवीन पनवेल येथील के. आ. बांठिया माध्यमिक विद्यालयाने आपल्या शैक्षणिक उत्कृष्टतेसह प्रशासकीय गुणवत्ता, भौतिक सुविधा आणि सामाजिक योगदान यामध्ये सातत्यपूर्ण उल्लेखनीय कामगिरी केल्याने त्‍यांना आयएसओ मानांकन मिळाले आहे. या अभिमानास्पद सोहळ्याचे आयोजन विद्यालयात मोठ्या उत्साहात पार पडले.
या कार्यक्रमाला अनेक मान्यवरांची उपस्थिती लाभली. यामध्ये संस्था अध्यक्षा गीता पालरेचा, ज्येष्ठ संचालक मोतीशेठ बांठिया, सु.ए.सो.चे संचालक व प्राचार्य राजेंद्र पालवे, गटशिक्षणाधिकारी सीताराम मोहिते, प्राचार्य माळी, प्राचार्य लहू पचांग, आयएसओ विभागप्रमुख विजय नाडे, पनवेल तालुका मुख्याध्यापक संघाचे अध्यक्ष पंकज भगत, पर्यवेक्षक, शिक्षक, शिक्षकेतर कर्मचारी तसेच पत्रकार, पालक व विद्यार्थी मोठ्या संख्येने सहभागी झाले होते. प्रास्ताविक भाषणात प्राचार्य माळी यांनी आयएसओ मानांकनाचा अर्थ, प्रक्रियेतील आव्हाने व सहभागी यांचे योगदान स्पष्ट केले. माळी यांनी सांगितले, शाळेच्या पोषण आहार योजना, विविध उपक्रम, कार्यालयीन प्रक्रिया, सामाजिक उपक्रम तसेच शिक्षक, विद्यार्थी, पालक व समाजाचा सहभाग यामुळेच हे यश शक्य झाले. शाळेचे ज्येष्ठ पर्यवेक्षक बी. यू. महाजन यांनी यासाठीच्या सातत्यपूर्ण प्रयत्नांची माहिती दिली.