महापारेषणचे चार वरिष्ठ अधिकारी निलंबित

महापारेषणचे चार वरिष्ठ अधिकारी निलंबित
भरती प्रक्रियेत अनियमितता

सकाळ वृत्तसेवा
मुंबई, ता. ५ : महापारेषणने विद्युत सहाय्यकांची २,६०० पदे भरण्यासाठी जून २०२४ मध्ये भरती प्रक्रिया राबवली होती. त्यामध्ये अनियमितता झाल्याप्रकरणी महापारेषणच्या व्यवस्थापकीय संचालकांनी मुख्य महाव्यवस्थापक (मानव संसाधन) याच्यासह चार वरिष्ठ अधिकाऱ्यांचे निलंबन केले आहे.
याप्रकरणी त्यांची आता सखोल चौकशी होणार आहे. वरिष्ठ अधिकाऱ्यांवर बडतर्फीची कारवाई झाल्याने महापारेषणमध्ये खळबळ उडाली आहे. महापारेषणने राबवलेल्या भरती प्रक्रियेनुसार मे महिन्यात २,४०० उमेदवारांना नियुक्तिपत्र दिले आहेत. नियुक्ती देताना अनियमतता झाल्याचा संशय आल्याने प्रशासनाने मानव संसाधन विभागाचे मुख्य महाव्यवस्थापक, महाव्यवस्थापक, उपमहाव्यवस्थापक आणि वरिष्ठ व्यवस्थापक यांचे निलंबन केले असल्याची माहिती सूत्रांनी दिली. याबाबत महापारेषणचे व्यवस्थापकीय संचालक डाॅ. संजीव कुमार यांच्याशी संपर्क साधण्याचा प्रयत्न केला असता तो होऊ शकला नाही.