ठाणे जिल्हा परिषदेवर भाजपचीच सत्ता

शहापूर, ता. ५ (वार्ताहर) : ठाणे जिल्हा परिषदेच्या इतिहासात आजवर भाजपचा कधीही झेंडा फडकलेला नाही. मात्र, आगामी निवडणुकीत जिल्हा परिषदेवर भाजपचीच सत्ता आणण्यासाठी सर्व कार्यकर्त्यांनी झटून काम करावे, असे आवाहन माजी केंद्रीय राज्यमंत्री कपिल पाटील यांनी सोमवारी (ता. ४) कसारा येथे केले. भाजप उत्तर मंडळ व कपिल पाटील फाउंडेशनच्या वतीने शहापूर तालुक्यातील कसारा येथील कार्यकर्ता मेळाव्यात ते बोलत होते.
भाजपच्या संघटनात्मक ताकदीत शहापूर तालुक्यात झपाट्याने वाढ होत आहे. गावोगावी भाजपाचे नेटवर्क विस्तारले आहे. माजी आमदार पांडुरंग बरोरा यांच्यासह अनेक कार्यकर्ते भाजपमध्ये प्रवेश करत आहेत. यामुळे पक्षाला आगामी निवडणुकांमध्ये नक्कीच फायदा होईल, असे प्रतिपादन कपिल पाटील केले. पंतप्रधान नरेंद्र मोदी, मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण यांनी सामान्य नागरिकांमध्ये भाजपविषयी विश्वास निर्माण केला आहे. केंद्र व राज्य सरकारच्या योजनांमुळे सामान्य जनतेचे जीवनमान उंचावले आहे. त्याचा परिपाक भाजपच्या विजयात होणार आहे, असा विश्वासही त्यांनी व्यक्त केला.
येत्या काही महिन्यांत जिल्हा परिषद व पंचायत समितीच्या निवडणुका होणार आहेत. महायुतीचा निर्णय वरिष्ठ नेत्यांकडून होईल. महायुतीमध्येही भाजपच सर्वाधिक जागा जिंकेल. आणि जर स्वबळावर लढावे लागले, तरी पूर्ण बहुमतासाठी प्रयत्नांची पराकाष्ठा करावी लागेल, असे कपिल पाटील पुढे म्हणाले.
या मेळाव्यात भाजपमध्ये मोठ्या प्रमाणावर कार्यकर्त्यांनी प्रवेश केला. या वेळी माजी आमदार पांडुरंग बरोरा, जिल्हाध्यक्ष जितेंद्र डाकी, माजी तालुकाध्यक्ष भास्कर जाधव, पूर्व मंडळ अध्यक्ष सुभाष हरड, कसारा शहराध्यक्ष विनायक सावंत आदी पदाधिकारी आणि कार्यकर्ते उपस्थित होते.

डोक्यावरीर हंडा उतरणार
शहापूरमधील महिलांच्या डोक्यावरून हंडा उतरवण्यासाठी भाजपने पुढाकार घेतल्याचे सांगत कपिल पाटील यांनी “भावली धरणातून पाणीपुरवठा करण्याच्या योजनेसाठी २०० कोटी रुपयांची मागणी मुख्यमंत्री देवेंद्र फडणवीस यांच्याकडे केली होती. त्या मागणीनंतर या योजनेला गती मिळाली आहे. आगामी काळात योजना पूर्णत्वास नेली जाईल, असा विश्वास व्यक्त केला.