दरोडेखोऱ्यांच्या टोळीला अटक

दरोडेखोऱ्यांच्या टोळीला अटक
दोन गावठी बनावटीच्या पिस्तूल, आठ जिवंत काडतुसे जप्त

भाईंदर, ता. ५ (बातमीदार) : दरोडा टाकण्याच्या तयारीत असलेल्या सात जणांच्या टोळीला मिरा-भाईंदर, वसई-विरार पोलिसांच्या खंडणीविरोधी पथकाने काशी मिरा येथे अटक केली. त्यांच्याकडून दोन गावठी बनावटीच्या पिस्तूल व आठ जिवंत काडतुसे हस्तगत करण्यात आली आहेत.

काशी मिरा भागातील पेणकरपाडा परिसरातल्या एका हॉटेलजवळ दरोडा टाकण्यासाठी सोमवारी (ता. ४) सायंकाळी काहीजण एकत्र येणार असून त्यांच्याकडे हत्यारे असल्याची माहिती खंडणीविरोधी पथकाचे पोलिस निरीक्षक राहुल राख यांना मिळाली होती. त्यानंतर पोलिसांच्या दोन पथकांनी संबंधित हॉटेलजवळ सापळा रचला. त्यानंतर रात्री साडेनऊ वाजण्याच्या सुमारास हॉटेलजवळील एका इमारतीसमोर दोन संशयित कार येऊन थांबल्या. या वेळी पोलिसांनी कारमध्ये असलेल्या नागरिकांना बाहेर येण्याचे आवाहन केले; मात्र कारचालकाने कार वेगाने पळवून नेण्याचा प्रयत्न केला; मात्र पोलिसांनी बळाचा वापर करून कार थांबवली व त्यातील तीन जणांना बाहेर काढले. या वेळी झालेल्या झटापटीत कारच्या काचा फुटल्या. या वेळी दुसऱ्या पथकाने दुसऱ्या कारमधील चार जणांना ताब्यात घेतले. त्यांची झडती घेतली असता त्यांच्याकडे दोन देशी बनावटीच्या मॅगझीनसह पिस्तूल व आठ जिवंत काडतुसे, तसेच दोन फायटर पंच, सुती रस्सी, आठ मोबाईल फोन असा मुद्देमाल सापडला.

आरोपींना पोलिस कोठडी
रोहित खेमजीभाई वनकार ऊर्फ परमार, प्रतीक कृष्णा भोईर, निरज ज्ञानेश्वर वेखंडे, समीर नारायण पालवी, भावेश आत्माराम गवारळे, अमर मोहन शिर्के, विजय दिनेश पारघडे अशी आरोपींची नावे असून न्यायालयाने त्यांना शुक्रवारी (ता. ८)पर्यंत पोलिस कोठडी सुनावली आहे. आरोपींवर यापूर्वी विविध पोलिस ठाण्यात गुन्हे दाखल केले आहेत.