पहिलीपासून एनसीसीच्या अभ्यासक्रमाची चाचपणी

पहिलीपासून एनसीसीच्या अभ्यासक्रमाची चाचपणी
मंत्रालयात झालेल्या पहिल्या बैठकीत तयारीवर चर्चा
मुंबई, ता. ५ : राज्यातील शाळांमध्ये पहिल्याच्या वर्गापासूनच प्रत्येक विद्यार्थ्यांना देशप्रेम, शिस्त लागावी, यासाठी राष्ट्रीय कॅडेट कोरच्या (एनसीसी) धर्तीवर अभ्यासक्रम सुरू करण्याची चाचपणी शालेय शिक्षण विभागाकडून केली जात आहे. या पार्श्वभूमीवर शालेय शिक्षणमंत्री दादा भुसे यांची एनसीसीच्या वरिष्ठ अधिकाऱ्यांसोबत महत्त्वाची बैठक पार पडली.
बालवयातच मुलांना देशप्रेम आणि शिस्त लागावी, यासाठी शालेय शिक्षणमंत्री भुसे यांनी काही महिन्यांपूर्वी पहिलीपासून सैनिकी शिक्षण देण्याची घोषणा केली होती. त्याच पार्श्वभूमीवर आज मंत्रालयात बैठक झाली. या बैठकीत राज्यातील प्रत्येक शाळेमधील विद्यार्थ्यांना एनसीसीचे शिक्षण कसे देता येईल, त्यासाठी लागणारे मनुष्यबळ आणि इतर सोयीसुविधांवरही चर्चा झाली. या वेळी एनसीसीच्या वरिष्ठ अधिकाऱ्यांनी सध्या आठवी आणि नववीच्या विद्यार्थ्यांना देण्यात येणाऱ्या विविध श्रेणींची माहिती दिली. महाविद्यालय स्तरावर विद्यार्थी पोहोचल्यानंतर त्यांना दिल्या जाणाऱ्या श्रेणी ते विद्यार्थी सैनिक अथवा इतर सरकारी सुरक्षा यंत्रणांमध्ये कसे जातात तसेच राज्यात सुरू असलेल्या एनसीसीच्या केंद्राची माहिती दिली.
--
माजी सैनिकांचा शाळांसाठी पर्याय
राज्यातील प्रत्येक शाळेमध्ये एनसीसीकडून मनुष्यबळ पुरविणे शक्य नाही; मात्र त्या मोबदल्यात एनसीसीच्या केंद्राव्यतिरिक्त राज्यात सर्वत्र माजी सैनिकांचा पर्याय असून, तो उपलब्ध करून घेता येईल, अशी माहितीही अधिकाऱ्यांकडून देण्यात आल्याचे सांगण्यात आले.