अदानी समुहाला दिलेला भूखंड सीआरझेडबाहेर

अदाणी समूहाला दिलेला भूखंड सीआरझेडबाहेर
महापालिकेचा प्रतिज्ञापत्राद्वारे उच्च न्यायालयात दावा 
सकाळ वृत्तसेवा
मुंबई, ता. ५ ः वांद्रे रिक्लेमेशन येथील अदाणी समूहाला निवासी प्रकल्पास मंजूर केलेला भूखंड सीआरझेडबाहेरचा असल्याचा दावा मुंबई महापालिकेने प्रतिज्ञापत्रामार्फत उच्च न्यायालयात केला आहे.  
पर्यावरणप्रेमी झोरू बाथेना आणि वांद्रे रिक्लेमेशन एरिया व्हॉलंटियर्स ऑर्गनायझेशन (ब्राव्हो) यांनी भराव टाकून उपलब्ध झालेला भूखंडाच्या खासगी विकासाला परवानगी देण्याच्या महाराष्ट्र राज्य रस्ते विकास महामंडळाच्या (एमएसआरडीसी) योजनेला जनहित याचिकेमार्फत उच्च न्यायालयात आव्हान दिले होता. या प्रकल्पाला स्थगिती देण्याची आणि सीआरझेड नियमांचे उल्लंघन करून खासगी विकसकाला दिलेली जागा पूर्ववत करण्याची मागणी केली आहे. त्या याचिकेची दखल घेऊन मुख्य न्या. आलोक आराधे आणि न्या. संदीप मारणे यांच्या खंडपीठाने महापालिकेने प्रतिज्ञापत्राद्वारे भूमिका स्पष्ट करण्याचे आदेश दिले होते.
त्यानुसार चेन्नईस्थित इन्स्टिट्यूट ऑफ रिमोट सेन्सिंग, अण्णा विद्यापीठाच्या प्रकल्प वास्तुविशारदाने तयार केलेला अहवाल पालिकेकडेस सादर केला. त्या अहवालाच्या आधारे अदाणी समूहाला निवासी प्रकल्पासाठी दिलेला वांद्रे रिक्लेमेशन येथील भूखंड सीआरझेड क्षेत्राच्या बाहेर असल्याचा दावाही महापालिकेने एच- पश्चिम विभागाचे सहाय्यक अभियंत्यांनी केला आहे.
तथापि, भाथेना यांनी अतिरिक्त प्रतिज्ञापत्र दाखल करून एमएसआरडीसीने महत्त्वाची तथ्ये दडपल्याचा आरोपही केला आहे.