नेत्र चिकित्सक डॉक्टरांविरोधात गुन्हा

नेत्रचिकित्सक डॉक्टरांविरोधात गुन्हा
निष्काळजी उपचारामुळे अनेकांना ‘सुडोमोनास’ संसर्ग
नवी मुंबई, ता. ५ (वार्ताहर) : वाशी सेक्टर १०मधील पंडित आय सर्जरी अँड लेझर रुग्णालयामध्ये उपचार घेतलेल्या अनेक रुग्णांच्या डोळ्यांना गंभीर इजा होऊन सुडोमोनसचा संसर्ग झाल्याचे तसेच काही रुग्णांवर दृष्टी गमावण्याची वेळ आल्याची धक्कादायक घटना उघडकीस आली आहे. या डॉक्टरकडे उपचार घेतल्यानंतर एक डोळा गमावलेल्या ६७ वर्षीय ज्येष्ठ नागरिकाने वाशी पोलिस ठाण्यात तक्रार दाखल केली आहे. त्यानुसार पोलिसांनी डॉ. चंदन पंडित आणि डॉ. डी. व्ही. पंडित या दोघांविरोधात गुन्हा दाखल केला आहे.

कोपरखैरणे येथे राहणारे राजेंद्र गुप्ता (वय ६७) हे डिसेंबर २०२४ मध्ये पंडित आय सर्जरी अँड लेझर रुग्णालयात डॉ. चंदन पंडित यांच्याकडे डोळ्यांच्या उपचारासाठी गेले होते. चंदन यांनी आधी उजव्या डोळ्याची शस्त्रक्रिया केली. त्यानंतर डाव्या डोळ्याची डोळ्याची शस्त्रक्रिया केली; मात्र दोन्ही शस्त्रक्रियांनंतर गुप्ता यांच्या डोळ्यांची दृष्टी कमी झाली. शुगर वाढलेली असतानाही डॉक्टरने शस्त्रक्रिया केल्याचा आरोप गुप्ता यांनी केला. याशिवाय, त्यांनी उपचाराच्या कोणत्याही कागदपत्रांवर स्वत:चे नाव न देता डॉ. डी. व्ही. पंडित यांचे नाव वापरल्याचे गुप्ता यांचे म्हणणे आहे. त्यानंतर त्यांच्या डोळ्यांतील स्राव तपासणीसाठी दिला असता, त्यांना सुडोमोनस संसर्ग असल्याचे स्पष्ट झाले. डॉ. पंडित यांच्या रुग्णालयात उपचार घेतलेल्या किसन भिकाजी धनावडे (६९) त्यांची पत्नी लक्ष्मी धनावडे (६४), संजीव महेश गुप्ता व अंजनी सावंत यांच्या डोळ्यांनादेखील गंभीर इजा झाल्याचा प्रकार समोर आला आहे. पंडित यांच्या निष्काळजीमुळे या सर्वांच्या डोळ्यांना कायमस्वरूपी इजा झाल्याचे गुप्ता यांनी आपल्या तक्रारीत म्हटले आहे.

डॉ. चंदन पंडित यांच्या पदवीची महाराष्ट्र मेडिकल कौन्सिलमध्ये नोंदणी व नूतनीकरण क्रमांक नसताना ते पंडित वाशीत रुग्णालय चालवत असल्याची गंभीर बाब गुप्ता यांनी आपल्या तक्रारीत नमूद केली आहे. त्यानुसार वाशी पोलिसांनी डॉ. चंदन पंडित आणि डॉ. डी. व्ही. पंडित यांच्याविरोधात गुन्हा दाखल करून पुढील तपास सुरू केला आहे.