नवलखा यांची दिल्लीत राहण्याची मागणी फेटाळली

एल्गार परिषद प्रकरण
-----
नवलखा यांची दिल्लीत
राहण्याची मागणी फेटाळली
सकाळ वृत्तसेवा
मुंबई, ता. ५ ः  एल्गार परिषद-माओवादीसंबंधीत प्रकरणातील कथित आरोपी मानवाधिकार कार्यकर्ते गौतम नवलखा (वय ७२) यांची दिल्लीत काही काळ वास्तव्य करण्याची मागणी विशेष न्यायालयाने नुकतीच फेटाळून लावली. तसेच वारंवार एकप्रकारची मागणी करून दिलासा मागितल्याबद्दल त्यांना फटकारले. 
जामिनाच्या अटीनुसार, नवलखा यांना मुंबईत राहण्याचे आदेश देण्यात आले होते; परंतु वारंवार एकसारखा अर्ज अनेकदा दाखल करण्याची युक्ती नवलखा यांनी कल्पकतेने शोधल्याची टिप्पणीही विशेष न्यायालयाचे न्यायाधीश सी. एस. बाविस्कर यांनी नुकत्याच दिलेल्या आदेशात नमूद केले. त्या आदेशाची प्रत मंगळवारी उपलब्ध झाली.  राष्ट्रीय तपास यंत्रणेच्या प्रकरणांसाठी विशेष न्यायालयाने नोव्हेंबर २०२४ मध्ये नवलखा यांना दोन महिने दिल्लीत राहण्याची परवानगी दिली होती. त्यानुसार नव्याने अर्ज करून नवलखा यांनी ४५ दिवसांसाठी पुन्हा दिल्लीत राहण्याची परवानगी मागितली होती. त्याच आदेशाचा संदर्भ अथवा त्या आदेशावर अवलंबून राहून वारंवार एकसारखा अर्ज करणे हे अजिबात अपेक्षित नाही. तुम्ही जे काम थेट करू शकत नाही, ते अप्रत्यक्षपणे करू इच्छित आहात, अशा शब्दांत न्यायालयाने नवलखा यांना सुनावले. तसेच तुमच्या या कृतीबद्दल तुम्हाला दंड आकारण्यापासून आम्ही स्वतःला  रोखत असल्याचेही न्यायालयाने नमूद केले. सर्वोच्च न्यायालयाच्या आदेशानुसार, नवलखा सध्या नवी मुंबईतील घरात नजरकैदेत आहेत.