भगवान वीरेश्वरराच्या दर्शनासाठी गर्दी

भगवान वीरेश्वरराच्या दर्शनासाठी गर्दी
खोपोलीतील पेशवेकालीन मंदिर आकर्षणाचे केंद्र
खोपोली, ता.६ (बातमीदार)ः शहरातील पेशवे कालीन भगवान शंकराचे वीरेश्वर मंदिरात श्रावणामुळे भक्तांची गर्दी होत आहे. त्यामुळे मुंबई-पुण्याच्या मध्यावर व कोकण आणि घाट माथ्याला जोडणारे खोपोली शहर अद्यात्माचे केंद्र बनले आहे.
१७५८ मध्ये पेशव्यांनी या मंदिराची उभारणी केली होती. पुणे येथील शनिवार वाडा येथून सुधागड स्थित बल्लाळेश्वर व महड येथील वरदविनायकाच्या दर्शनासाठी खोपोली घाट मार्गे पेशव्यांचे येणे जाणे असल्याचे पुरावे येथे आहेत. मध्यावरील तसेच नैसर्गाने नटलेले श्रीमंत शहर असल्याने घाट चढण्यापूर्वी विश्रांतीसाठी या मंदिराची निर्मिती झाल्याचे सांगण्यात येते. मंदिराच्या बांधकामासाठी लागणारे दगड आयात करण्यात होते. मंदिराचे कोरीव काम बांधकामाचा उत्कृष्ट नमुना आहे. भव्य सभागृह, आकर्षक प्रवेशद्वार, एकाच दगडात निर्मिती केलेला भला मोठा नंदी, त्याच्यावरील बांधाकाम मनाला शांती देते. तर मंदिराच्या गाभार्यात वीरेश्वराच्या पिंडीच्या स्थापनेसाठी काशी येथून पुरोहितांना पाचारण करण्यात आले होते.
---------------------------------
हेमांडपंथीय बांधणी
भगवान वीरेश्वर मंदिर २० मीटर उंचीचे आहे. साध्या हेमांडपंथीय बांधणीचे आहे. येथून घाट, सह्याद्रीचे सुंदर रूप भाविकांना पहावयास मिळते. पावसाळ्या हे दृश अतिशय रमणीय असते. विरेश्वराच्या उजव्या बाजूला अगळीत असलेली एक समाधी आहे. श्रावणात या मंदिरात भाविकांची मोठी गर्दी असते. तसेच महाशिवरात्रीच्या दिवशी मोठा उत्सव भरविला जातो. याच दिवशी भगवान विरेश्वराची पालखी पूर्ण शहरातून काढण्यात येते. हा पालखी सोहळा खोपोलीचा महत्त्वाचा उत्सव झाला आहे.
----------------------------------
चित्रपट, नाटकांचे निर्मिती केंद्र
या मंदिरासमोर भव्य अष्टकोनी तलाव बांधण्यात आला आहे. तब्बल तीन शतके खोपोलीची तहान भागविण्याचे काम या तलावानेच केले. या तलावाची निर्मिती पेशव्यांनी त्याचे घोडे, हत्ती व सैनिकांना पिण्यासाठी व इतर वापरासाठी हक्काचे पाणी केले गेले होते. पेण तालुक्यातील सावरसाई येथील माहेर असलेल्या राणी आंनदीबाई यांनी त्यांच्याकडील दागिने खर्च करून तलावाची निर्मिती केली होती. भाविकासाहित पर्यटकांसाठी हे मंदिर मोठे आकर्षण बनले असून अनेक चित्रपट व नाटकांची निर्मिती या ठिकाणी झाली आहे.