रायगडमध्ये जनधन खात्यांची तपासणी

रायगडमध्ये जनधन खात्यांची तपासणी
१ जुलै ते ३० सप्टेंबरदरम्यान गावागावांत जनजागृती मोहीम
अलिबाग, ता. ६ (वार्ताहर) ः रायगड जिल्ह्यातील जनधन योजनेतील खातेधारक, तसेच सामाजिक सुरक्षा योजनांच्या लाभार्थ्यांसाठी १ जुलैपासून ‘री-केवायसी’ आणि नव्या नोंदणीसाठी व्यापक अभियान सुरू करण्यात आले आहे. भारत सरकारच्या वित्त मंत्रालय आणि रिझर्व्ह बँकेच्या निर्देशांनुसार हे अभियान ३० सप्टेंबरपर्यंत चालणार असून, जिल्हा प्रशासन, विविध बँका आणि ग्रामपंचायतींच्या माध्यमातून गावागावांत शिबिरे आयोजित करण्यात येत आहेत.
या अभियानाचा शुभारंभ रायगडचे जिल्हाधिकारी किशन जावळे आणि मुख्य कार्यकारी अधिकारी नेहा भोसले यांच्या उपस्थितीत रविवारी करण्यात आला. या वेळी जिल्हा अग्रणी प्रबंधक विजय कुलकर्णी यांनी सर्व नागरिकांना शिबिराचा लाभ घेण्याचे आवाहन केले. यामध्ये ‘जनधन खात्यांचे’ री-केवायसी, प्रधानमंत्री जीवन ज्योती विमा योजना, प्रधानमंत्री सुरक्षा विमा योजना आणि अटल पेन्शन योजना यांसारख्या योजनांची नोंदणी केली जात आहे. अनेक जनधन खाती आता दहा वर्षांचा कालावधी पूर्ण करत असल्याने री-केवायसी प्रक्रिया अनिवार्य झाली आहे. त्यामुळे लाभाची सातत्यपूर्ण अंमलबजावणी होण्यासाठी ही प्रक्रिया गरजेची आहे. बँका आता ग्रामपंचायतींमध्ये जाऊन थेट सेवा देत आहेत.
...................
विशेष मेळाव्याचे आयोजन
याच अभियानांतर्गत शुक्रवार (ता. ८) रोजी बँक ऑफ इंडियाचे व्यवस्थापकीय संचालक आणि सीईओ रजनीश कर्नाटक यांच्या प्रमुख उपस्थितीत सेंट्रल स्कूल, आमटेम येथे एक विशेष मेळावा आयोजित करण्यात आला आहे. या वेळी पाबळ खोरेतील कोंढवा, वरप, जिर्णे येथील आदिवासी नागरिकांना योजनांमध्ये सहभागी करून घेण्यात येणार आहे. या उपक्रमामुळे दुर्गम भागातील नागरिकांना बँकिंग सेवा आणि सामाजिक सुरक्षेचे कवच सहज मिळू शकेल, असा विश्वास व्यक्त करण्यात येत आहे. नागोठणे, आमटेम, पाबळ खोरे आणि पेण तालुक्यातील नागरिकांनी या सुवर्णसंधीचा लाभ घ्यावा, असे आवाहन कुलकर्णी यांनी केले आहे.