सोनोपंत दांडेकर महाविद्यालयाचा सोहम घरत ठरला ''मिस्टर युनिव्हर्सिटी ''!

सोनोपंत दांडेकर महाविद्यालयाचा सोहम घरत मिस्टर युनिव्हर्सिटी
पालघर, ता. ६ (बातमीदार) ः सोनोपंत दांडेकर महाविद्यालयाचा विद्यार्थी सोहम घरत याने मुंबई विद्यापीठाच्या युवा महोत्सवामध्ये मिस्टर युनिव्हर्सिटी २०२४-२५ हा मानाचा किताब पटकावला आहे. मुंबई विद्यापीठाच्या युवा महोत्सवात विविध महाविद्यालयांतील हजारो विद्यार्थी सहभागी झाले होते. त्यामध्ये सोहमने आपल्या अप्रतिम व्यक्तिमत्त्वाच्या जोरावर बाजी मारली.
मुंबई विद्यापीठाच्या या प्रतिष्ठित युवा महोत्सवात विविध कला आणि सांस्कृतिक स्पर्धांचे आयोजन करण्यात आले होते. या महोत्सवात मुंबई शहरातील जवळपास ३५० महाविद्यालयांनी सहभाग घेतला होता. या स्पर्धेत सोहमने जॅकपॉट इव्हेंटमध्ये आपल्या महाविद्यालयाचे प्रतिनिधित्व केले. सोनोपंत दांडेकर शिक्षण मंडळीचे सोनोपंत दांडेकर कला, व्ही. एस. आपटे वाणिज्य आणि एम. एच. मेहता विज्ञान महाविद्यालय, पालघर या संस्थेचे प्रतिनिधित्व करताना सोहमने मिस्टर युनिव्हर्सिटी हा पुरस्कार जिंकला. त्यामुळे महाविद्यालयात आनंदाचे वातावरण आहे.
महाविद्यालयाचे प्राचार्य डॉ. किरण सावे यांनी सोहमचे अभिनंदन केले आणि त्याला पुढील वाटचालीस शुभेच्छा दिल्या. त्यांनी सांगितले, की सोहमने आपल्या महाविद्यालयाचा नावलौकिक वाढवला आहे आणि इतर विद्यार्थ्यांसाठी तो एक आदर्श आहे. संस्थेचे अध्यक्ष सीए सचिन कोरे, उपाध्यक्ष धनेश वर्तक, प्रताप वारय्या, कोषाध्यक्ष मंगेश पंडित, सचिव सुधीर कुलकर्णी, अनिल पाटील, महाविद्यालयाचे उपप्राचार्य डॉ. महेश देशमुख, प्रा. डॉ. तानाजी पोळ आणि इतर सदस्यांनीही सोहमचे अभिनंदन केले.
सोनोपंत दांडेकर महाविद्यालयाने यापूर्वीही शिक्षण, कला आणि क्रीडा क्षेत्रांत अनेक पुरस्कार मिळवले आहेत. मिस्टर युनिव्हर्सिटी पुरस्कारामुळे महाविद्यालयाच्या शिरपेचात आणखी एक मानाचा तुरा खोवला आहे. तसेच मिस युनिव्हर्सिटी या स्पर्धेमध्ये महाविद्यालयाच्या श्रेया गायकवाड या विद्यार्थिनीने उत्तेजनार्थ पारितोषिक पटकाविले आहे. महाविद्यालयातील प्राध्यापक, कर्मचारी आणि विद्यार्थीवर्गाने सोहम आणि श्रेयाचे अभिनंदन केले आहे.

फोटो
पालघर ः मुंबई विद्यापीठाचे कुलगुरू रवींद्र कुलकर्णी आणि इतर मान्यवरांच्या हस्ते सोहम घरत याने ‘मिस्टर युनिव्हर्सिटी’ पुरस्कार स्वीकारला.