गणेशोत्सव मंडपासाठी ८८ मंडळांचे अर्ज

गणेशोत्सव मंडपासाठी ८८ मंडळांचे अर्ज
परवानगी अवघ्या एका मंडळाला
सकाळ वृत्तसेवा
ठाणे, ता. ६ : गणेशोत्सव अवघ्या काही दिवसांवर येऊन ठेपला आहे. या सणाच्या पार्श्वभूमीवर सार्वजनिक गणेशोत्सव मंडळांकडून मंडप उभारणीसाठी पालिका प्रशासनाकडून परवानगी घेणे बंधनकारक आहे. त्यानुसार आतापर्यंत ८८ मंडळांनी गणेशोत्सव मंडपासाठी अर्ज केले असून, त्यापैकी एकाच मंडळाला पालिकेने परवानगी दिली आहे. त्यामुळे अजूनही ८७ मंडळे परवानगीच्या प्रतीक्षेत आहेत.
ठाणे महापालिका क्षेत्रात गणेशोत्सव मोठ्या उत्साहात साजरा करण्यात येतो. या उत्सवासाठी सार्वजनिक गणेशोत्सव मंडळांकडून रस्त्यावर मंडप उभारणी करण्यात येते. गणेशोत्सवासाठी विनापरवानगी मंडप उभारण्यात येऊ नये, असे उच्च न्यायालयाचे सक्त आदेश आहेत. विनापरवानगी मंडप उभारल्यास उच्च न्यायालयात अवमान याचिका दाखल होऊ शकते.
ठाणे पालिकेकडे मागील वर्षी गणेशोत्सव मंडप परवानगीसाठी ऑनलाइन आणि ऑफलाइन असे एकूण ३३३ अर्ज दाखल झाले होते. यापैकी २६४ मंडळांना परवानगी देण्यात आली होती. यंदा गणेशोत्सवासाठी २० दिवस बाकी आहेत. या गणेशोत्सव मंडप परवानगीसाठी ८८ मंडळांनी अर्ज केले आहेत. त्यात ५८ मंडळांनी ऑनलाइनद्वारे तर ३० मंडळांनी ऑफलाइनद्वारे अर्ज केले आहेत. ८८ मंडळांपैकी एकाच मंडळाला मंडप उभारण्यासाठी परवानगी देण्यात आली असल्याची माहिती पालिका सूत्रांनी दिली.
------------------------------
ऑफलाइनद्वारे अर्ज करण्याची सुविधा
मंडप उभारणीसाठी ठाणे महापालिका, वाहतूक पोलिस आणि अग्निशमन विभागाची परवानगी बंधनकारक असते. त्यानुसार पालिका प्रशासनाकडून ऑनलाइन, ऑफलाइन अर्ज करण्याची सुविधा गणेशोत्सव मंडप परवानगी मिळविण्यासाठी सार्वजनिक उत्सव मंडळांना उत्सवाच्या किमान एक महिना अगोदर अर्ज करणे आवश्यक असते. मंडप उभारणीच्या परवानगीसाठी ठाणे महापालिका गेल्या पाच वर्षांपासून मंडळांना ऑनलाइन आणि ऑफलाइनद्वारे अर्ज करण्याची सुविधा उपलब्ध करून देते. ही सुविधा यावर्षीदेखील पालिकेने उपलब्ध करून दिली आहे.
---------------------------------------