दोन वर्षांपासून प्रशासनाचा लढा

४३ गुंठे जमिनीचे ‘इनाम’
शहापूर पंचायत समितीच्या लढ्याला यश; परस्पर विक्रीचा प्रकार
भरत उबाळे : सकाळ वृत्तसेवा
शहापूर, ता. ६ : शहापूर पंचायत समितीच्या कार्यालय आवारातील ध्वजस्तंभ आणि छत्रपती शिवाजी महाराजांच्या शिवतीर्थासह उर्वरित जमिनीची परस्पर विक्री करण्यात आली होती. याबाबत सातत्याने पाठपुरावा केल्यामुळे आता रीतसर सातबारा व मालमत्तेच्या दस्तऐवजांवर ठाणे जिल्हा परिषदेच्या मुख्य कार्यकारी अधिकाऱ्यांच्या नावाची नोंद करण्यात आली आहे. यासाठी प्रशासनाने तब्बल दोन वर्षांचा लढा दिला होता. आता या प्रक्रियेमुळे शहापूर पंचायत समितीची सुमारे ४३ गुंठे जमीन स्वमालकीची झाली आहे.

शहापूर पंचायत समितीच्या कार्यालय आवारातील छत्रपती शिवाजी महाराजांचे शिवतीर्थ व ध्वजस्तंभाची २०२१मध्ये विक्री केल्याचे विवादित प्रकरण घडले होते; मात्र या जमिनीवर ६० वर्षांहून अधिक काळ शहापूर पंचायत समितीचा कब्जा व वहिवाट अशी नोंद होती. शासन परिपत्रकावर इनाम जमिनीची नोंद होती. परंतु मूळ खातेदारांच्या वारसांनी प्रशासनाला अंधारात ठेवून या जमिनीचा परस्पर विक्री व्यवहार केला होता. सद्य:स्थितीतल्या बाजारभावानुसार या जमिनीचे सुमारे दोन कोटी बाजारमूल्य आहे. मात्र ही जमीन अवघ्या ४५ लाखांत चौघांना बेकायदा विक्री केली होती. शहापूरमधील नागरिकांनी ऑगस्ट २०२३मध्ये या संपूर्ण प्रकरणाचा भंडाफोड केल्यानंतर या बेकायदा खरेदी-विक्री व्यवहाराची सखोल चौकशी करण्यात आली.

ध्वजस्तंभ, शिवतीर्थ यासह पंचायत समितीच्या जमिनीच्या विक्रीचे केलेले बेकायदा खरेदीखत त्वरित रद्द करा, या मागणीसाठी शहापूरवासीयांनी स्वातंत्र्यदिनी धरणे आंदोलन करण्याचा इशारा दिल्याने शहापुरातील सर्वपक्षीय जनता एकवटल्याने प्रशासनाचेदेखील धाबे दणाणले होते. शहापूर पंचायत समितीच्या बांधकाम विभागाचे उपअभियंता विनयकुमार खैरनार यांनी संबंधित जमिनीचा सातबारा व मालमत्ता पत्रक पंचायत समितीच्या नावावर होण्यासाठी तहसीलदार व भूमी अभिलेख विभागाकडे सातत्याने पाठपुरावा सुरू ठेवला होता. त्यांच्या पाठपुराव्याला यश आले आहे.

विवाद निर्माण झालेल्या पंचायत समितीच्या आवारातील जमिनीचा प्रश्न आता सुटला असून, ही जमीन आता पंचायत समिती व जिल्हा परिषदेच्या नावे नोंदली गेली आहे. त्यामुळे गेली काही वर्षे प्रलंबित असलेले प्रकरण मार्गी लागले आहे.
- बी. एच. राठोड, गटविकास अधिकारी, शहापूर