सरकारी शाळेतील शिक्षक निस्पृहतेचे प्रतीक

सरकारी शाळेतील शिक्षक निस्पृहतेचे प्रतीक
वारे गुरुजींचे प्रतिपादन
वाडा, ता.३ (बातमीदार) ः सरकारी शाळेचे शिक्षक हे विद्यार्थ्यांप्रती प्रामाणिक, निस्पृह व समर्पित असतात. त्यांनी केवळ ज्ञानदान नव्हे तर मूल्यसंस्काराचीही जबाबदारी पार पाडली पाहिजे, असे प्रतिपादन ज्येष्ठ शिक्षणतज्ज्ञ वारे गुरुजी यांनी रविवारी (ता. ३) केले. ते नॅशनल एज्युकेशन सोसायटी हॉल, कुडूस येथे गुरुतत्त्व २०२५- एक विसर्जित शिखर परिषद या कार्यक्रमात प्रमुख वक्ते म्हणून बोलत होते.
वारे गुरुजी म्हणाले की, विद्यार्थ्यांच्या समृद्ध भविष्यासाठी शिक्षकांनी कोणताही भेदभाव न करता केवळ त्यांच्या उज्ज्वलतेसाठी काम करावे हेच गुरुतत्त्वचे खरे मर्म आहे. शाळेतील बहुभाषिक विद्यार्थी, दुर्गम भाग आणि अपुऱ्या भौतिक सुविधा या बाबी आव्हान नसून याला संधी मानून प्रत्येकाने काम केले पाहिजे. प्रतिकूल परिस्थितीही बदलण्याचे काम केवळ शिक्षकच करू शकतात, असा विश्वासही त्यांनी व्यक्त केला.
परिषदेमध्ये भारतीय शिक्षण प्रणालीची पुर्नकल्पना मांडण्यात आली. शिक्षकांनी बदलत्या शैक्षणिक वातावरणातील भूमिका समजून घेत, राष्ट्रीय शिक्षण धोरण २०२० अंतर्गत शाळांचे रूपांतर कसे करता येईल, डिजिटल शिक्षणाचे आव्हान कसे पेलता येईल आणि मूल्याधारित शिक्षणावर भर देत जागतिक स्तरावरील शाळा यावर विचारमंथन करण्यात आले.
यावेळी जालिंदरनगर शाळेचे मुख्याध्यापक तथा शिक्षणतज्ज्ञ दत्तात्रय वारे गुरुजी, कुडूस गावाचे सरपंच राजेंद्र कोंगील, उपक्रमशील तथा आदर्श शिक्षक राजन गरुड, सावित्रीबाई फुले आदर्श शिक्षिका पुरस्कार प्राप्त शिल्पा वनमाळी, इंजि. उत्कर्ष पाटील आदी मान्यवर होते. यावेळी पालघर, नवी मुंबई, ठाणे आणि नाशिक जिल्ह्यातील निवडक शिक्षक मोठ्या संख्येने उपस्थित होते.