माणगाव-दिघी मार्गावर मनस्ताप

माणगाव, ता. ६ (वार्ताहर)ः माणगाव-दिघी मार्गावरील निजामपूर बसस्थानक परिसरात पुण्याकडून येणाऱ्या कारने बसथांब्यावर उभ्या असलेल्या दोन रिक्षांना धडक दिली होती. या अपघातात एकाचा मृत्यू झाला आहे तर विद्यार्थिनी जखमी आहे. त्यामुळे बेकायदा पार्किंगमुळे होणाऱ्या वाहतूक कोंडीमुळे अपघातांचे प्रमाण वाढले आहे.
निजामपूर बसस्थानकासमोरील दिघी-पुणे महामार्गाच्या दोन्ही बाजूने रिक्षा थांबे तसेच बेकायदा पार्किंगमुळे नेहमीच वाहतूक कोंडी होत असते. याबाबत अनेक वेळा स्थानिकांनी अनेकदा तक्रारी केल्या आहेत; मात्र तोडगा निघाला नसल्याने एकापाठोपाठ एक अपघातांची मालिका सुरू आहे. निजामपूर बसस्थानक परिसरात सोमवारी (ता. ४) सकाळी झालेल्या अपघातात एका प्रवाशाला जीव गमवावा लागला होता. पुण्याकडून माणगावकडे येणाऱ्या कारने प्रवाशांसह एका विद्यार्थिनीला जोरदार धडक दिली होती. या अपघातात सलीम चाफेकर यांचा उपचारादरम्यान मृत्यू झाला आहे, तर प्रगती सुतार ही विद्यार्थिनी जखमी आहे. या प्रकारामुळे रस्त्यालगत होणाऱ्या बेकायदा पार्किंगचा प्रश्न पुन्हा अधोरेखित केला असून प्रशासनाने तातडीने उपाययोजना करण्याची मागणी स्थानिक करत आहेत.
---------------------
वादावादीचे प्रकार
अनेकदा रिक्षाचालक प्रवासी मिळवण्यासाठी रस्त्यावरच वाहने उभी करत असल्याने कोंडी होत आहे. सुट्टीच्या काळात असे प्रकार वांरवार होत असल्याने निजामपूर बसस्थानक कोंडीचे केंद्र झाले आहे. त्यामुळे वाहनचालकांचे वादावादीचे प्रकार वाढले आहेत.