महसूलविषयक खटल्यांचा निपटारा

अलिबाग, ता. ६ (वार्ताहर)ः महसूलविषयक न्यायालयातील प्रलंबित खटल्यांचा जलदगतीने निपटारा करण्याच्या हेतूने अलिबाग येथील उपविभागीय अधिकाऱ्यांच्या न्यायालयात लोकअदालत होणार आहे. अलिबाग, मुरूड येथील प्रकरणावर सुनावणी होणार आहे.
अलिबाग येथील उपविभागीय अधिकाऱ्यांच्या न्यायालयात ११ ऑगस्ट, १२ ऑगस्ट, १८ ऑगस्ट, १९ ऑगस्ट व २५ ऑगस्ट या दिवशी सकाळी १२ ते दुपारी दोन व दुपारी तीन ते सायंकाळी पाच या वेळेत महसूल लोकअदालत होत आहे. त्यामुळे न्यायालयात महसूल लोकअदालतीमध्ये सुनावणीचे दिवशी संबंधित विधिज्ञ तसेच पक्षकारांनी लेखी म्हणणे सादर करावे, असे आवाहन उपविभागीय अधिकारी अलिबाग मुकेश चव्हाण यांनी केले आहे. महसूल प्रशासनातील मंडळ अधिकारी, तहसीलदार व उपविभागीय अधिकारी यांच्याकडील अर्धन्यायिक कामकाजामध्ये अनेक वेळा महसुली दावे दाखल झाल्यानंतर विविध कारणांमुळे प्रलंबित राहतात. अशा प्रकरणांचा महसूल लोकअदालतीतून निपटारा होणार आहे.