कर्जत शहरातील धोकादायक इमारतीवर नगरपरिषदेकडून कारवाई

‘त्या’ इमारतीवर नगरपरिषदेकडून कारवाई
इमारतीचा छताचा भाग कोसळलाः नागरिकांमध्ये भीतीचे वातावरण
कर्जत, ता. ६ (बातमीदार) ः कर्जत शहरातील हनुमान मंदिरासमोर असलेली सुमारे २७-२८ वर्षे जुनी अनुसया सहकारी गृहनिर्माण संस्था ही इमारत धोकादायक स्थितीत असल्याचे पुन्हा निदर्शनास आले आहे. या इमारतीचा छताचा काही भाग नुकताच कोसळल्याने परिसरात भीतीचे वातावरण निर्माण झाले आहे. नगरपरिषदेने तातडीने कारवाई सुरू केली असून पाणी आणि वीज पुरवठा काढण्याचे आदेश दिले आहेत.
अनुसया सहकारी गृहनिर्माण संस्थेच्या बिल्डींगचा मंगळवारी (ता. ५) तळमजल्याच्या स्लॅबचा काही भाग पडल्याने एकच खळबळ उडाली असून नगरपरिषद प्रशासन अधिक सतर्क झाले आहे. कर्जत नगरपरिषद हद्दीत सुमारे १३२ घरे, चाळी, इमारती धोकादायक असून नगरपरिषदेने त्यांना सुद्धा नोटीस याआधी बजावलेल्या आहेत.
या इमारतीला कर्जत नगरपरिषदेकडून आधीच धोकादायक घोषित करण्यात आले होते. इमारतीच्या सुरक्षिततेच्या दृष्टीने नगरपरिषदेने रहिवाशांना वेळोवेळी सूचना व नोटिसा पाठवून इमारत मोकळी करण्याचा आदेश दिला होता.

पाणीपुरवठा व वीजपुरवठा बंद
दरम्यान, इमारतीच्या पाण्याचा पुरवठा तात्काळ बंद करण्यात आला आहे आणि महावितरणला वीज कनेक्शन बंद करण्यासाठी अधिकृत पत्र देण्यात आले आहे. पोलिस विभागालाही संरक्षणासाठी पत्रव्यवहार करण्यात आला आहे. या इमारतीत कोणताही रहिवास करू नये. अन्यथा कोणतीही जिवीत वा वित्तहानी झाल्यास सदनिका/गाळा धारक स्वतः जबाबदार राहतील, असे आवाहन नगरपरिषदेने सदर भागात सूचना बॅनर लावले आहे.

जनतेच्या सुरक्षेसाठी ही कारवाई अत्यावश्यक होती. इमारत कोसळण्याच्या दृष्टीने कोणतीही ढिलाई न ठेवता तात्काळ उपाययोजना केल्या जात आहेत. अनुसया सहकारी गृहनिर्माण संस्था ही इमारत धोकादायक घोषित केलेली असून कोणीही रहिवास करु नये. कर्जत नगरपरिषद हद्दीत सुमारे १३२ घरे, चाळी, इमारती धोकादायक असून नगरपरिषदेने त्यांना सुद्धा नोटीस याआधी बजावलेल्या आहेत.
- तानाजी चव्हाण, मुख्याधिकारी कर्जत नगरपरिषदत्या