शालेय चाचणी परीक्षा वेळापत्रकात बदल

शालेय चाचणी परीक्षा वेळापत्रकात बदल
शालेय शिक्षण विभागाकडून परिपत्रक जाहीर
जुईनगर, ता. ६ (बातमीदार) : शालेय शिक्षणातील चाचणी परीक्षा सत्र सध्या सर्वच शाळांमध्ये सुरू आहे. त्या अनुषंगाने काही शाळांनी जुलै महिन्याच्या शेवटचा आठवडा तर काही शाळांनी ऑगस्ट महिन्याचा पहिला आठवडा असे वेळापत्रक जाहीर केले होते; मात्र शालेय शिक्षण विभागाकडून मंगळवारी (ता. ५) परिपत्रक जाहीर करून नारळी पौर्णिमा आणि रक्षाबंधनदिनी सुट्टी जाहीर केली आहे. यामुळे शाळांचे वेळापत्रक बदलले आहे.
या वर्षातील पायाभूत चाचणी (पॅट १) परीक्षेबाबत वेळापत्रकात बदल करण्याबाबत सूचना दिल्या आहेत. याबाबत प्राथमिक विभाग शिक्षणाधिकारी जिल्हा परिषद ठाणे बाळासाहेब राक्षे यांनी परिपत्रक काढून तसे आदेश दिले आहेत; मात्र अचानक जाहीर झालेल्या सुट्ट्यांमुळे शाळांच्या परीक्षा वेळापत्रकात बदल झाले आहेत. वाशी आणि नेरूळमधील काही शाळांनी परीक्षा वेळापत्रकात बदल केल्याने विद्यार्थी आणि पालक गोंधळून गेल्याचे सांगण्यात येत आहे.

आमच्या शाळेतील मुलांना वेळापत्रकात शनिवारी (ता. ९) परीक्षा सांगण्यात आली होती. नंतर सुट्टी जाहीर झाल्याने सुरुवातीला आम्हाला एकएक पेपर पुढे गेला असे वाटले; मात्र आता शनिवारी घेण्यात येणारा पेपर थेट गुरुवारी (ता. १४) घेण्यात येणार असल्याचे शाळेने सांगितले आहे.
- शामा पाटील