मोकाट गुरांनी घेतला रस्त्याचा ताबा वाहतूक कोंडी सह अपघात भीती

मोकाट गुरांनी घेतला रस्त्याचा ताबा
वाहतूक कोंडीसह अपघाताची भीती
उरण, ता. ६ (वार्ताहर)ः तालुक्यातील विविध भागात रस्त्यावर रात्री अपरात्री मोकाट गुरांचा वावर वाढल्याने वाहनांचा अपघात होऊन जीवितहानी होण्याची भीती वर्तविली जात आहे. तर, वाहतूक कोंडीला ही कारण ठरत आहे. त्यामुळे पशुधन विभागाने याकडे गंभीर्याने लक्ष देऊन गो शाळांमध्ये गुरांची रवानगी करण्याची मागणी जोर धरू लागली आहे.
उरणमध्ये औद्योगिकरणांमध्ये झपाट्याने वाढ होऊ लागली आहे. त्यामुळे प्रत्येक नागरिक नोकरी-धंद्याकडे वळू लागला आहे. त्यामुळे या परिसरातील शेतकऱ्याचे शेती करण्याकडे लक्ष कमी झाले. पूर्वी ग्रामीण भागात प्रत्येकाकडे गुरे होती. मात्र, आता शेतीचे प्रमाण कमी झाल्याने शेतकऱ्यांनी गुरे पाळण्याचे सोडून दिले आहे. त्यामुळे गुरे मोकाट फिरू लागली आहेत.

अपघातांची भीती
गुरे रात्री अपरात्री रस्तावर ठिय्या मांडतात. परिणामी वाहन चालकांना रस्त्यावर बसलेल्या गुरांचा अंदाज न आल्याने वाहनांवरुन नियंत्रण सुटून अपघातांची भीती असते. असे अनेक अपघात रात्रीच्या वेळी झाले आहेत. त्यामध्ये गुरेही दगावली आहेत. वाहन चालकांना ही मोठ्या दुखापतीला सामोरे जावे लागले आहे.यामुळे पशुधन विभागाने मोकाट गुरांचा प्रश्नाकडे गांभीर्याने लक्ष केंद्रित करण्याची मागणी जोर धरू लागली आहे.

हा मुद्दा महत्वाचा आहे. त्याचे रस्त्यावर बसल्याने अपघात होत आहेत. त्यासाठी मोकाट जनावरांना आम्ही पकडण्याचा प्रयत्न एका गो शाळा संस्थेच्या माध्यमातून केले होते. आमचे प्रयत्न सुरु आहेत.
- एस. एम. भोजने, पशुधन विकास अधिकारी, उरण