रक्षाबंधन सणासाठी एसटीच्या जादा फेऱ्या

रक्षाबंधन सणासाठी एसटीच्या जादा फेऱ्या
पेण, पनवेल, अलिबाग, नागोठणे, खोपोलीकरीता फेऱ्या
पेण, ता. ६ (वार्ताहर) : रायगड जिल्हा परिवहन विभागाने रक्षाबंधन सणासाठी महिलांची वाढती गर्दी लक्षात पेण स्थानकामार्फत एसटीच्या जादा फेऱ्या वाढविल्या आहेत. यामध्ये पेण, पनवेल, अलिबाग, नागोठणे, खोपोली या मार्गाकरता ज्यादा फेऱ्या होणार आहेत.
राज्य सरकारने महिलांकरीता एसटीच्या प्रवासासाठी अर्ध्या तिकीटाची सवलत दिल्यामुळे दररोजच्या प्रवासामध्ये महिलांची संख्या मोठ्या प्रमाणात वाढू लागली आहे. नारळी पौर्णिमा आणि रक्षाबंधन सणाच्या पार्श्वभूमीवर जिल्ह्यातील मध्यवर्ती ठिकाण असणाऱ्या पेण एसटी स्थानकात प्रवासासाठी महिलांचीवाढत आहे. यानुसार एसटी विभागाने शुक्रवार (ता. ८)पासून पेण-पनवेल आणि पेण-अलिबाग, पनवेल-अलिबाग या फेऱ्या वाढविल्या आहेत. शनिवारी (ता. ९) येथून पनवेल, अलिबाग, नागोठणे, खोपोली अशा जास्तीच्या फेऱ्या वाढविण्यात येणार असल्याचे सांगितले आहे. याचा फायदा महिलांसह इतर प्रवासी वर्गांनी घ्यावा. महिलांनी सुरक्षितपणे एसटीमधून प्रवास करत असताना चालक, वाहक यांनाही सहकार्य करावे, असे आवाहन एसटी आगार व्यवस्थापक अपर्णा वर्तक यांनी केले आहे.