पाच तासांच्या शस्त्रक्रियेनंतर डोक्यातून काढली सळई

पाच तासांच्या शस्त्रक्रियेनंतर डोक्यातून काढली सळई
भिवंडी, ता. ६ (वार्ताहर) : शहरात मंगळवारी दुपारी दोन वाजण्याच्या सुमारास मेट्रो पुलावरून एक लोखंडी सळई खाली रस्त्यावरून जाणाऱ्या रिक्षाच्या आरपार जाऊन प्रवाशाच्या डोक्यात शिरल्याची घटना घडली. या गंभीर दुखापतीनंतरही यामधील जखमी सोनू अली हा शुद्धीत राहिला आहे. सोनू अली याच्यावर पाच तासांच्या शस्त्रक्रियेनंतर त्याच्या डोक्यात शिरलेला सळईचा भाग बाहेर काढण्यात वैद्यकीय पथकाला यश आले आहे. त्याची प्रकृती स्थिर असल्याची माहिती डॉ. श्रुती शेळके यांनी दिली आहे.

ठाणे- भिवंडी- कल्याण मेट्रो प्रकल्प पाचअंतर्गत पहिल्या टप्प्यातील काम जवळजवळ ८० टक्के पूर्ण झाले आहे. त्यातच मेट्रोच्या पुलावरून लोखंडी सळई खाली रस्त्यावरून जाणाऱ्या रिक्षाच्या आरपार जाऊन प्रवाशाच्या डोक्यात शिरल्याची घटना मंगळवारी (ता. ५) दुपारी घडली. अपघातानंतर स्थानिकांच्या मदतीने सोनूला अंजूरफाटा येथील खासगी रुग्णालयात दाखल करण्यात आले. याप्रकरणी हलगर्जी करणाऱ्या अज्ञाताविरोधात गुन्हा दाखल करून चौकशी सुरू करण्यात आली आहे. सोनू अली हा मोलमजुरी करून आपल्या कुटुंबीयांचा उदरनिर्वाह करतो. एकटाच कमावता असल्यामुळे या घटनेमुळे त्यांच्या कुटुंबीयांवर उपासमारीची वेळ आली आहे. याप्रकरणी अपघातास जबाबदार मेट्रो कंत्राटदाराने सोनू अली याच्या सर्व उपचाराचा खर्च करून त्यास नुकसानभरपाई देण्याची मागणी स्थानिकांकडून केली जात आहे.