आजारी वडिलांना भेटण्यासाठी तात्पुरता जामीन द्या!

आजारी वडिलांना भेटण्यासाठी तात्पुरता जामीन द्या!
रमेश गायचोर यांची याचिका

सकाळ वृत्तसेवा
मुंबई, ता. ६ ः एल्गार परिषद प्रकरणातील कथित आरोपी रमेश गायचोर यांनी त्यांच्या आजारी वडिलांना भेटण्यासाठी तात्पुरता जामीन देण्याची मागणी याचिकेत केली आहे. त्या याचिकेची दखल घेऊन उच्च न्यायालयाने (ता. ६) राष्ट्रीय तपास यंत्रणेला (एनआयए) भूमिका स्पष्ट करण्याचे आदेश दिले.
गायचोर यांनी विशेष एनआयए न्यायालयाकडे केलेला अर्ज न्यायालयाने १ जुलैला फेटाळून लावला. त्या आदेशाला गायचोर यांनी उच्च न्यायालयात आव्हान दिले आहे. हे प्रकरण बुधवारी न्या. अजय गडकरी आणि न्या. राजेश पाटील यांच्या खंडपीठासमोर सुनावणीसाठी आले. या वेळी एनआयएच्या वतीने बाजू मांडण्यासाठी दोन आठवड्यांचा वेळ मागण्यात आला. तो मान्य करून न्यायालयाने सुनावणी तहकूब केली. वडिलांचे वय ७५ वर्षे असून ते आजारी आहेत आणि पुण्यातील रुग्णालयात दाखल करण्यात आले आहे. त्यामुळे मानवीय दृष्टिकोनातून अंतरिम जामीन देण्याची मागणी गायचोर यांनी केली होती. दरम्यान, एल्गार परिषदेच्या आयोजनात सहभागी असलेल्या आणि जमावाला भडकाविल्याच्या आरोपाखाली कबीर कला मंचचे रमेश गायचोर यांना एनआयए ७ सप्टेंबर २०२०मध्ये अटक केली होती.