उच्चदाब वीज वाहिन्यांचे जाळे होणार मजबूत

उच्चदाब वीजवाहिन्यांचे जाळे होणार मजबूत
नवी मुंबई, पुणे, धाराशिवमध्ये पुरवठ्याची क्षमता वाढणार

सकाळ वृत्तसेवा
मुंबई, ता. ६ : सध्या २९ हजार मेगावाॅटच्या घरात असलेली विजेची मागणी पुढील पाच वर्षांत ४५ हजार मेगावाॅटपर्यंत पोहोचणार आहे. त्यामुळे वाढत्या मागणीची पूर्तता करण्यासाठी राज्याच्या कानाकोपऱ्यात अनेक वीज प्रकल्प उभारले जात आहेत. त्यामध्ये तयार होणारी वीज मुंबई, नवी मुंबई, पुणे अशा प्रमुख शहरांपर्यंत वाहून आणण्यासाठी उच्चदाब वीजवाहिन्या टाकण्यासाठी आणि वीज उपकेंद्र उभारण्यास राज्य सरकारने मंजुरी दिली आहे. त्यानुसार वीजदरावर आधारित स्पर्धात्मक निविदांच्या माध्यमातून विशेष हेतू कंपन्यांकडून कामे केली जाणार आहेत. त्यामुळे भविष्यात राज्यातील उच्चदाब वीजवाहिन्यांचे जाळे मजबूत होणार असल्याचे निश्चित झाले आहे.
राज्यात सध्या मोठ्या प्रमाणात औष्णिक वीज केंद्रे असून, त्यामध्ये तयार होणारी वीज महापारेषणच्या उच्चदाब वीजवाहिन्यांच्या माध्यमातून वीज वितरण कंपन्यांच्या वीज उपकेंद्रांपर्यंत आणली जात आहे. मात्र सध्या वेगवेगळ्या ठिकाणी सौरऊर्जा प्रकल्प, पवनऊर्जा प्रकल्प, रूफटाॅप सोलर, उदंचन जलविद्युत प्रकल्प उभारले जात आहेत. त्यामुळे मुंबई, नवी मुंबई, संभाजीनगर, पुणे येथे विजेची मागणी वाढू शकते. त्या ठिकाणी पोहोचवता यावी म्हणून उच्चदाब वीजवाहिन्या, वीज उपकेंद्रे उभारली जाणर आहेत. पुढील ३० वर्षांपर्यंत या वीजवाहिन्यांच्या संचालनाची जबाबदारी संबंधित कंपनीची असणार आहे.
...
या ठिकाणी उभारणी
- नवी मुंबईतील महापे येथे उपकेंद्र उभारणी व संबंधित जोड प्रणाली
- जेजुरी-हिजेवाडी ही वीजवाहिनी डबल सर्किट केली जाणार
- पुणे जिल्ह्यातील सासवड येथे वीज उपकेंद्र उभारणी व संबंधित जोडवाहिन्या उभारणार
- धाराशिव जिल्ह्यातील वाशी येथे उपकेंद्र उभारणी व संबंधित जोडप्रणाली
- वेलगाव उपकेंद्र (जीआयएस) व संबंधित जोडप्रणाली