तुतारी एक्स्प्रेसच्या वेळापत्रकात सुधारणा करा

तुतारी एक्स्प्रेसच्या वेळापत्रकात सुधारणा करा
स्लॅक टाइममुळे चाकरमान्यांचा खोळंबा; प्रवासी सेवा समितीची मागणी
सकाळ वृत्तसेवा
मुंबई, ता. ६ : कोकण मार्गावर धावणाऱ्या दादर-सावंतवाडी रोड तुतारी एक्स्प्रेस या एकमेव दैनंदिन गाडीला प्रचंड प्रवासी प्रतिसाद असूनही, वेळापत्रकातील तांत्रिक त्रुटींमुळे चाकरमान्यांना नाहक त्रास सहन करावा लागत आहे. या गाडीच्या वेळापत्रकातील अनावश्यक ‘स्लॅक टाइम’ (सुटसुटीत वेळ) आणि दीर्घ थांबे तातडीने कमी करावेत, अशी मागणी अखंड कोकण रेल्वे प्रवासी सेवा समितीने केली आहे.
दादर स्थानकातून मंगळवारी (ता. ५) रात्री १२.०७ वाजता निघालेली ११००३ तुतारी एक्स्प्रेस दुपारी १२.५९ वाजता सावंतवाडी रोड येथे पोहोचली. केवळ नऊ मिनिटे उशीर दाखवण्यात आला असला तरी प्रत्यक्ष प्रवासात वेळेचे नियोजन अत्यंत अकार्यक्षम असल्याचे स्पष्ट झाले आहे.
या गाडीचे वेळापत्रक तयार करताना अत्यधिक स्लॅक टाइम दिल्याने प्रवाशांचा मौल्यवान वेळ वाया जात असल्याचे प्रवासी संघटनांचे म्हणणे आहे. रत्नागिरीसारख्या प्रमुख स्थानकांवर तासभर थांबण्याची गरज नाही; परंतु वेळापत्रकातील ढिसाळ नियोजनामुळे हे घडत असल्याचे प्रवासी सेवा समितीचे सचिव अक्षय महापदी यांनी सांगितले.

तासभर एकाच स्थानकात
तुतारी एक्स्प्रेस खेड, चिपळूण, सावर्डा, आरवली रोड, संगमेश्वर रोड आदी स्थानकांवर १० ते २० मिनिटे वेळेआधी पोहोचते. विशेष म्हणजे रत्नागिरी येथे ही गाडी नियोजित वेळेच्या तब्बल ६३ मिनिटे आधी सकाळी ७.५७ वाजता पोहोचते आणि त्यानंतर तब्बल ६८ मिनिटे तिथेच थांबते. एवढा सैलावलेला वेळ असूनही गाडी शेवटी उशिराच पोहोचते.

प्रमुख मागण्या
- वेळापत्रकातील स्लॅक टाइम कमी करून अंतिम टप्प्यावर वळवावा
- रत्नागिरीसह इतर स्थानकांवरील अनावश्यक थांबे कमी करावेत
- संपूर्ण वेळापत्रक वस्तुनिष्ठपणे पुन्हा तयार करावे