अर्नाळा येथे दिव्यांग मुलांसाठी नोंदणी शिबिर

पालघर (बातमीदार) : नूतन गुळगुळे फाउंडेशन, अंधेरी पश्चिमेतील स्नेहांकित हेल्पलाइन आणि अर्नाळा ग्रामपंचायत यांच्या संयुक्त विद्यमाने दिव्यांग मुलांसाठी दोनदिवसीय नोंदणी शिबिर प्रभात कॉलनीतील स्वानंद सेवा सदन येथे आयोजित करण्यात आले आहे. १६ ऑगस्ट रोजी सकाळी ११ ते सायंकाळी पाच आणि १७ ऑगस्टला सकाळी ११ ते दुपारी दीड वाजेपर्यंत शिबिराची वेळ असणार आहे. या शिबिराद्वारे दिव्यांग व्यक्तींची सरकारी राजपत्रात नोंदणी (२१ दिव्यांग श्रेणींसाठी) करण्यात येईल. दिव्यांग मुलांचे सशक्तीकरण आणि त्यांच्यासाठी आवश्यक असलेल्या शासकीय योजना आणि सेवा उपलब्ध करून देण्याबाबत नूतन गुळगुळे फाउंडेशन आणि स्नेहांकित हेल्पलाइन यांच्या वतीने प्रयत्न केले जाणार असून, तज्ज्ञांकडून शिबिरात मार्गदर्शन केले जाईल. अधिक माहिती व नोंदणीसाठी गुळगुळे फाउंडेशनच्या व्यवस्थापक मेघा घोडे (८१४९४७४९९१, ९९२०३८३००६) यांच्याशी संपर्क साधण्याचे आवाहन करण्यात आले आहे.