कृष्णजन्माष्टमीनिमित्त बाजार सजला

कृष्ण जन्माष्टमीनिमित्त बाजार सजला
विविध वस्तू दाखल, सजावटीचे विविध पर्याय
नेरूळ, ता. ७ (बातमीदार)ः श्रावणातील विविध सणांपैकी एक असलेल्या श्रीकृष्ण जन्माष्टमीनिमित्त घराघरात लाडक्या कृष्णाच्या आगमनासाठी तयारीला वेग आला आहे. यानिमित्त बाजारातूही सजावटीच्या विविध वस्तू, पाळणे, मोरपीस, बासरी आणि पोशाख खरेदीसाठी गर्दी होत असून श्रीकृष्ण मंदिर, इस्कॉन मंदिरातही जन्माष्टमीची तयारी सुरू झाली आहे.
श्रावणातील महत्त्वाच्या सणांपैकी एक असलेली श्रीकृष्ण जन्माष्टमी देशभरात साजरी केली जाणार आहे. कृष्ण जन्माष्टमीचे देशभरात विशेष महत्त्व आहे. हिंदू धर्मातील सणांपैकी हा प्रमुख सण आहे. जन्माष्टमी विविध राज्यांमध्ये वेगवेगळ्या पद्धतीने साजरी केली जाते. लहानांपासून मोठ्यांपर्यंत लाडक्या कृष्णजन्माच्या स्वागतासाठी उत्सुक आहे. त्यामुळे बाजारपेठाही साहित्यांनी सजल्या आहेत.
-------------------------------
पाळणा ः घरोघरी कृष्ण जन्माष्टमी साजरी करतात. त्यात कृष्णाचा पाळणा हा महत्त्वाचा असते. घरी कृष्णासाठी सजलेले पाळणे, झुले, मखमली कापड, आरसे, फुलांनी सजवलेले पाळणे, लाकडी पाळणे २०० पासून २००० रुपयांपर्यंत उपलब्ध आहेत.
-------------------
मखमली पोषाख ः श्रीकृष्णाला सजवण्यासाठी विविध आकाराचे मखमली पोषाख बाजारात उपलब्ध आहे. धोती, घागरा, पगडी, कानातले, मोरपीस, बाजूबंद यांचा समावेश आहे. अगदी पन्नास रुपयांपासून दोनशे रुपयांपर्यंत हे दागिने बाजारात उपलब्ध आहेत, तसेच लहान मुलांना वेशभूषा करण्यासाठी श्रीकृष्णाचे व राधेचे कपडे बाजारात विक्रीसाठी आले आहेत.
-----------------------
मोरपंख ः मोरपंखाशिवाय श्रीकृष्णाची सजावट अपूर्ण राहते. श्रीकृष्णाच्या मुकुटावर कायम मोरपंख असतो. सप्तरंगाचे प्रतीक आहे.
------------------------
मुकुट ः कृष्णाला सजवण्यासाठी मुकुट आकर्षण ठरत आहेत. मुकुटामुळे श्रीकृष्णाचे रूप खुलून दिसते. लहान आकारापासून ते मोठ्या आकारांमध्ये मोरपीस लावलेले, मोती-हिऱ्यांनी सजवलेले विविध रंगीत मुकुट विक्रीसाठी आलेले आहेत.
--------------------
बासरी ः श्रीकृष्णाला बासरी अत्यंत प्रिय आहे. साधेपणा आणि निरागसतेचे प्रतीक आहे. बासरीमुळे सकारात्मक ऊर्जेचा संचार होतो.
------------------------
कामधेनू गाय ः जन्माष्टमीला कामधेनू गाय शुभ मानली जाते. पौराणिक कथांमध्ये श्रीकृष्ण लहानपणापासून गायीची सेवा करत होते. त्यांना गोमाता अतिप्रिय आहे. यामुळे जन्माष्टमीच्या पूजेत गोमातेची ही मूर्ती ठेवून पूजा करण्यात येते.
------------------------
दहीहंडी ः दही श्रीकृष्णाला आवडते. जन्माष्टमीच्या पूजेनंतर दही किंवा लोण्याने भरलेली हंडी ठेवली जाते. विविध रंगीत डिझाइन आरशांनी सजवलेल्या हंड्या बाजारात २०० ते ५०० रुपयांपर्यंत उपलब्ध आहेत.
--------------------------------
कृष्ण जन्माष्टमीनिमित्त विविध आकर्षक वस्तू उपलब्ध आहेत. यावर्षी श्रीकृष्णाच्या मूर्तीसाठी सुंदर असे घागरे, फेटे, मोरपीस असलेल्या मुकुटांना मागणी आहे. अगदी लहान आकारापासून मोठ्या आकारापर्यंत श्रीकृष्णाचे पाळणे उपलब्ध आहेत.
- नरेश कोकाटे, विक्रेते, नेरूळ