गणेश चतुर्थीपूर्वी तळ्यातील वीजपुरवठा सुरळीत करा

गणेश चतुर्थीपूर्वी तळ्यातील वीजपुरवठा सुरळीत करा
राकेश वडके यांच्या नेतृत्वाखाली महावितरण अधिकाऱ्यांना निवेदन
तळा, ता. ७ (बातमीदार) : तळा तालुक्यात सध्या महावितरणच्या ढिसाळ कारभारामुळे नागरिकांमध्ये तीव्र नाराजी निर्माण झाली आहे. पावसाळ्यात वारंवार खंडित होणाऱ्या वीजपुरवठ्यामुळे सामान्य नागरिकांसह व्यावसायिकांचेही आर्थिक नुकसान होत आहे. आगामी गणेश चतुर्थीसारखा मोठा सण लक्षात घेता वीजपुरवठा सुरळीत करण्यात यावा, या मागणीसाठी शिवसेना (शिंदे गट) शहरप्रमुख राकेश वडके यांच्या नेतृत्वाखाली शिष्टमंडळाने रोहा येथील महावितरण कार्यालयात कार्यकारी अभियंता डाळू यांची भेट घेऊन लेखी निवेदन सादर केले.
निवेदनात अनेक महत्त्वाच्या मागण्या करण्यात आल्या आहेत. यामध्ये तळा शहरातील वारंवार होणाऱ्या वीज खंडनावर त्वरित उपाययोजना करणे, भुयारी वीजवाहिन्यांच्या मंजूर प्रकल्पास प्राधान्य देणे, मांदाड येथे प्रस्तावित नवीन सबस्टेशनला मंजुरी मिळवण्यासाठी पाठपुरावा करणे आदींचा समावेश आहे. तसेच, साले-इनकमर बोरघर येथे सबस्टेशन उभारणे, कंडक्टरअभावी ठप्प असलेल्या स्ट्रीट लाइट यंत्रणेवर उपाय करणे, वीज वितरणासाठी आवश्यक केबल्स, ट्रान्स्फॉर्मर, फ्यूज बॉक्स यांची दुरुस्ती व सुरक्षेची खबरदारी घेणे या तांत्रिक अडचणींवरही प्रकाश टाकण्यात आला. तसेच नवीन वीज कनेक्शनसाठी लागणारे सर्व्हिस वायर व साहित्य महावितरणने पुरवावे, कर्मचाऱ्यांना आवश्यक उपकरणे उपलब्ध करावीत आणि मुख्यालयी उपस्थित नसलेल्या अधिकाऱ्यांवर केवळ कारणे दाखवा नोटीस न देता थेट भत्ते बंद करून कारवाई करावी, अशीही ठोस मागणी या वेळी करण्यात आली. या शिष्टमंडळात तालुकाप्रमुख ॲड. मनोज शिंदे, जिल्हा कोअर कमिटी सदस्य लिलाधर खातू, नगरसेवक नरेश सुर्वे, मंगेश पोळेकर, माजी सरपंच रघुनाथ वाघरे, सिराज खाचे यांच्यासह अनेक मान्यवर उपस्थित होते.
...............
चौकट
यावर सकारात्मक प्रतिसाद देत कार्यकारी अभियंता डाळु यांनी निवेदनातील मागण्या लवकरात लवकर पूर्ण करण्याचे आश्वासन दिले. त्यांनी भुयारी वीजवाहिन्यांच्या टप्प्याटप्प्याने अंमलबजावणीस सुरुवात होईल असे सांगत, मांदाड सबस्टेशन प्रस्तावालाही वरिष्ठ स्तरावर पाठपुरावा केला जाईल असे नमूद केले.