कर्करोग विरोधात प्रशासन सरसावले

कर्करोगाविरोधात प्रशासन सरसावले
मोबाईल व्हॅनची सुविधा; दोन महिन्यांत सहा हजार नागरिकांची तपासणी
अलिबाग : सायली रावले
रायगड जिल्ह्यात कर्करोगाच्या तपासणीसाठी जिल्हा सामान्य रुग्णालयातर्फे फिरत्या मोबाईल व्हॅनची सोय करण्यात आली आहे. ऑन्को-लाइफ कॅन्सर सेंटरने कर्करोगाच्या निदानासाठी आणि जनजागृतीसाठी ही सुविधा सुरू केली आहे. या व्हॅनमध्ये कर्करोगाच्या तपासण्या, विशेषतः स्तनाच्या कर्करोगासाठी तपासणी केली जाते. फेब्रुवारी २०२५ मध्ये ही व्हॅन सुरू करण्यात आली असून एप्रिल आणि जुलै या दोन महिन्यांत रायगड जिल्ह्यामध्ये या व्हॅनच्या माध्यमातून तब्बल सहा हजार नागरिकांची तपासणी करण्यात आली आहे. आता ऑक्टोबर महिन्यात पुन्हा ही व्हॅन रायगड जिल्ह्यासाठी उपलब्ध होणार आहे.
महाराष्ट्रात आढळणा‍ऱ्या प्रमुख तीन कर्करोग प्रकारांमध्ये मुख, स्तन आणि गर्भाशय मुखाचा कर्करोग सर्वाधिक रुग्ण नोंदवले जात आहेत. या पार्श्वभूमीवर नागरिकांसाठी ही मोहीम मोफत राबवण्यात येत आहे. शासनाच्या माध्यमातून उपलब्ध करण्यात आलेल्या विशेष कर्करोग तपासणी वाहनामध्ये डेंटल चेअर, गर्भाशय, मुख तपासणीसाठी आवश्यक बेड, तसेच विविध वैद्यकीय साधनसामग्री उपलब्ध आहे. या वाहनाच्या साहाय्याने नागरिकांची शारीरिक तपासणी करून संशयित रुग्णांची नोंद केली जात आहे. या व्हॅनच्या माध्यमातून जिल्ह्यातील उपकेंद्र, प्राथमिक आरोग्य केंद्रात जाऊन तपासणी शिबिर घेतले जात आहे. शिबिरांतून मुख कर्करोगासाठी तज्ज्ञ डॉक्टरांकडून तपासणी आणि आवश्यक असल्यास ओरल बायोप्सी, स्तन कर्करोगासाठी क्लिनिकल तपासणी आणि मेमोग्राफीसाठी रुग्णालयात विनामूल्य संदर्भ, गर्भाशय मुख कर्करोगासाठी तपासणी आणि पॅप स्मीअर चाचणी केली जात आहे.
एप्रिल व जुलै या दोन महिन्यांत जिल्ह्यातील तब्बल सहा हजार नागरिकांची तपासणी करण्यात आली आहे. यामध्ये ३१ नागरिकांमध्ये कर्करोगाची लक्षणे आढळून आली आहेत. जिल्हा सामान्य रुग्णालयात तीन जणांची यशस्वी शस्त्रक्रिया करण्यात आली असून पाच जणांची केमोथेरपी व दोन जणांवर रेडिओथेरपी करण्यात आली आहे. त्याचप्रमाणे सहा रुग्णांच्या इतर तपासण्या करून त्यांना पुढील उपचाराबाबत मार्गदर्शन करण्यात आले आहे.
...................
चौकट :
एकूण तपासणी केलेले रुग्ण : सहा हजार
लक्षणे आढळलेले रुग्ण : ३१
शस्त्रक्रिया झालेले रुग्ण : ३
केमोथेरपी झालेले रुग्ण : ५
रेडिओथेरपी झालेले रुग्ण : २
.................
कोट :
रायगड जिल्हा हा आदिवासीबहुल जिल्हा असल्याने या समाजामध्ये अज्ञान व शिक्षणाचा अभाव यामुळे तंबाखू, गुटखा खाण्याचे प्रमाण जास्त आहे. त्यामुळे मुखाचा कर्करोग वाढत आहे. त्याचप्रमाणे महिला आपल्या आरोग्याकडे दुर्लक्ष करीत असल्याने स्तनाच्या कर्करोगाचे प्रमाणही वाढले आहे. कर्करोग व्हॅनमध्ये तपासणी केल्यानंतर जर लक्षणे आढळली तर रुग्णांनी तातडीने उपचार करणे आवश्यक आहे; मात्र अजूनही नागरिकांची मानसिकता आपल्याला उपचारांची गरज नाही, अशी आहे. त्यामुळे अनेक जण उपचार घेण्यास तयार होत नाहीत. त्यामुळे याबाबत जास्तीत जनजागृती आणि मार्गदर्शनाची गरज आहे.
- डाॅ. शीतल जोशी, अतिरिक्त जिल्हा शल्यचिकित्सक, रायगड