लेझीम, फुगडी आणि लगोरी, विटी दांडूसह पारंपरिक खेळांना पुनर्वैभव

लेझीम, फुगडी, लगोरी आणि विटी-दांडूसह पारंपरिक खेळांना पुनर्वैभव
खाशाबा जाधव पारंपरिक क्रीडा महाकुंभ १३ पासून

मुंबई, ता. ७ : पुण्यश्लोक अहिल्यादेवी होळकर यांच्या स्मृतिदिनानिमित्त कौशल्य विकास मंत्री मंगलप्रभात लोढा यांच्या संकल्पनेतून मुंबईत ऑलिम्पिकवीर खाशाबा जाधव पारंपरिक क्रीडा महाकुंभाचे आयोजन करण्यात आले आहे. येत्या १३ ते २२ ऑगस्टदरम्यान कुर्ला येथे जामसाहेब मुकादम शासकीय औद्योगिक प्रशिक्षण संस्थेच्या मैदानात मुंबईकरांना पारंपरिक खेळांचा थरार पाहायला मिळणार आहे. या क्रीडा महाकुंभाच्या माध्यमातून लेझीम, फुगडी, लगोरी आणि विटी-दांडूसह शिवकालीन पारंपरिक खेळांना पुनर्वैभव मिळवून देणार असल्याचे मंगलप्रभात लोढा यांनी म्हटले आहे.
पुण्यश्लोक अहिल्यादेवी होळकर यांनी संस्कृती रक्षणासाठी केलेले योगदान आपला देश विसरू शकत नाही. त्यांच्या स्मृतिदिनानिमित्त महाराष्ट्राचे सुपुत्र ऑलिम्पिकवीर खाशाबा जाधव यांच्या नावे हा क्रीडा महाकुंभ आयोजित करण्यात आला असल्याची माहितीही लोढा यांनी दिली.

पारंपरिक खेळांच्या या क्रीडा महाकुंभात कबड्डी, खो-खो, लगोरी, लेझीम, रस्सीखेच, मल्लखांब, पावनखिंड दौड, कुस्ती, पंजा लढवणे, विटी-दांडू, दोरीच्या उड्या, फुगडी आणि योग या क्रीडा प्रकारांत महिला आणि पुरुष गटातील सामन्यांचे आयोजन करण्यात आले आहे. ज्या तरुणांना, शाळा-महाविद्यालयीन विद्यार्थ्यांना, संस्थांना आणि क्रीडा मंडळांना यात सहभागी व्हायचे असेल त्यांनी ९८६७०६६५०६ अथवा ९७६८३२७७४५ या भ्रमणध्वनी क्रमांकावर संपर्क साधावा, असे क्रीडा भारतीकडून सांगण्यात आले आहे.