दिव्यांग मुलांच्या कल्‍पकतेतून साकारल्‍या राख्या

दिव्यांग मुलांच्या कल्‍पकतेतून साकारल्‍या राख्या
मुळेखंड येथील पीएम श्री शाळेतील उपक्रम
सकाळ वृत्तसेवा
नवी मुंबई, ता. ७ ः दोन दिवसांवर आलेल्‍या रक्षाबंधनाची तयारी सर्वत्र सुरू असून, भाऊ-बहिणींमधील या अतूट नात्‍याच्या सणामध्ये दिव्यांग मुलांनी दाखवलेली कल्‍पकतादेखील काैतुकास्‍पद आहे. उरण तालुक्‍यामधील मुळेखंड येथील पीएम श्री शाळेत झालेल्‍या कार्यशाळेत दिव्यांग मुलांनी स्‍वतः राख्या बनवून सुप्त कलागुण दाखवून दिले.
उरण पंचायत समितीच्या माध्यमातून समावेशित शिक्षण उपक्रमांतर्गत हा उपक्रम राबवण्यात आला. उरण पंचायत समितीच्या गटशिक्षणाधिकारी निर्मला घरत, समावेशित शिक्षण विभागातील शिक्षक मुकेश महाजन, प्रतिभा तायडे, सोनल पाटील, प्रीती जाधव यांच्या मार्गदर्शनाखाली पीएम श्री शाळेतील दिव्यांग बालके, अंगणवाडी व नजीकच्या शाळेतील मिळून ११ बालकांनी यामध्ये सहभाग घेतला.
विविध मनी, रंगीबेरंगी धागे यांच्या सहाय्‍याने आकर्षक राख्या बनवल्‍या. विद्यार्थ्यांच्या सुप्त गुणांना वाव मिळेल, सूक्ष्मकारक कौशल्यांचा विकास होईल, यासाठी हा उपक्रम राबवण्यात आला. हस्त व नेत्र यांचा समन्वय साधून एकाग्रता टिकवून ठेवणे, रंगसंगती यासारख्या विविध बाबी या कार्यशाळेतून विद्यार्थ्यांनी आत्मसात करून आनंद लुटला.

आत्‍मविश्‍वास वाढवण्याचा प्रयत्‍न
केंद्र सरकारच्या प्रधानमंत्री स्कूल्स फॉर रायझिंग इंडिया (पीएम श्री) या योजनेंतर्गत शाळांमध्ये दिव्यांग मुलांचा शारीरिक, मानसिक, भावनिक आणि सामाजिक विकास होण्यासाठी विविध उपक्रम राबवले जातात. मुलांच्या कल्पकतेचा विकास करणे, त्यांना स्वावलंबी बनवणे आणि त्यांचा आत्मविश्वास वाढवणे, यासाठी असे कार्यक्रम आयोजित केले जातात.