विद्यार्थ्यांना शैक्षणिक साहित्य वाटप

विद्यार्थ्यांना शैक्षणिक साहित्यवाटप
तुर्भे, ता. ७ (बातमीदार) : उलवे येथील रायगड जिल्हा परिषद शाळेत शालेय साहित्यांसह वह्या वाटप करण्यात आले. या वेळी विद्यार्थ्यांच्या चेहऱ्यावर आनंद आणि उत्साह ओसंडून वाहत होता. या कार्यक्रमाला परिसरातील मोठ्या संख्येने विद्यार्थी व पालक उपस्थित होते.
या वेळी विद्यार्थ्यांना दर्जेदार शिक्षण मिळावे, या अनुषंगाने कोळी-आगरी एकता मंडळ व जनुबाई चॅरिटेबल ट्रस्ट यांच्या माध्यमातून पोयसर जिमखाना बोरिवली यांच्या वतीने शालेय उपक्रमांतर्गत शैक्षणिक साहित्यासह शाळेतील सर्व मुलांना मान्यवरांच्या हस्ते वह्या आणि खाऊचे वाटप करण्यात आले. याप्रसंगी पोयसर जिमखान्याचे अध्यक्ष मुकेश भंडारी, राजन कोळी, प्रसाद डोलकर, ज्ञानेश्वर कोळी, नरहरी कोळी, दिनेश उलवेकर, तगदीर कोळी, गणेश कोळी, महेश कोळी, विशाल कोळी यांच्यासह कोंबडभुजे आणि गणेशपुरी ४० प्लस क्रिकेट संघांचे खेळाडू आणि पंचक्रोशीतील ग्रामस्थ मोठ्या संख्येने उपस्थित होते.
दरम्यान, आपली भावी पिढी ही खऱ्या अर्थाने देशाचे भवितव्य आहे आणि आज अनेक ग्रामीण भागात अर्थकारणामुळे अनेकांना आपले शिक्षण अर्ध्यात थांबवावे लागत आहे. त्यातूनच अनेक ठिकाणी शिकण्यासाठी योग्य साधनांची पूर्ती झाली नसल्याने शिक्षण थांबवावे लागते. अशाच काही मुद्द्यांवर लक्ष देत या संस्थेच्या माध्यमातून विद्यार्थ्यांना शैक्षणिक साहित्य वाटपाच्या माध्यमातून एक छोटासा प्रयत्न असल्याचे मत पोयसर जिमखान्याचे अध्यक्ष मुकेश भंडारी यांनी व्यक्त केले.