अंधेरी स्‍थानक पुलावर कबुतरांचा सुळसुळाट

अंधेरी स्‍थानक पुलावर कबुतरांचा सुळसुळाट
विष्‍ठेमुळे प्रवाशांच्या जीवाला धोका
जोगेश्‍वरी, ता. ७ (बातमीदार) ः अंधेरी रेल्वेस्थानकावरील पुलावर वन रूपी क्लिनिकलगत असलेल्‍या मोकळ्या परिसरात कबुतरांचा सुळसुळाट दिवसेंदिवस वाढत आहे. कबुतरांच्या विष्‍ठेमुळे प्रवाशांच्या जीवाला धोका निर्माण झाला आहे.
स्थानकाच्या पुलावर कबुतरे बसत असून, त्यांच्या विष्ठा प्रवाशांच्या अंगावर पडण्याचे प्रकार घडत आहेत. या पार्श्वभूमीवर रेल्वे प्रशासनाने फलकदेखील लावला आहे. रेल्वे परिसरात प्राणी वा पक्ष्यांना अन्न देणे प्रतिबंधित आहे. हे भारतीय रेल्वे कायद्याअंतर्गत दंडनीय असून, उल्लंघन केल्यास १,५०० रुपयांपर्यंत दंड आकारला जाऊ शकतो, असा इशारा दिला आहे. पण हा फक्त कागदी उपाय ठरत असल्याचे दिसते.
याबाबत अंधेरी स्‍थानक मास्‍तर विकास कुमार यांनी सांगितले, की पुलावर कबुतरांना अन्न टाकणाऱ्यांवर नजर ठेवण्यासाठी एक कर्मचारी लवकरच तैनात करण्यात येणार आहे. सकाळच्या वेळेत पाहणी वाढवली जाईल.
वन रूपी क्लिनिकचे डॉक्टर राजेश दुबे यांनी सांगितले, की पूर्वी पुलावर मोकळी जागा होती, परंतु मागील दोन-तीन महिन्यांपासून स्वच्छतेचे कंत्राटदार दत्ता कंद यांनी कबुतरे बसू नयेत, यासाठी सुचवलेल्‍या उपायावर रेल्‍वे प्रशासनाने येथे स्टीलचे चार बाकडे बसवले. उलटपक्षी त्या बाकड्यांवर तसेच आजूबाजूला कबुतरांचा वावर वाढला आहे. आम्हाला कोणी कबुतरांना अन्न देताना दिसले तर तत्काळ रेल्वे प्रशासनाला कळवतो. पण त्या वेळी तो व्यक्ती तिथून निघून गेलेला असतो. त्यामुळे कारवाई शक्य होत नाही, असे त्‍यांनी सांगितले.
पुलावर कबुतरांची विष्ठा, अन्नाचे कण, घाण यामुळे प्रवाशांना चालणे कठीण झाले आहे. त्‍यामुळे नागरिकांमध्ये रोष वाढत असून, या समस्येकडे रेल्वे प्रशासन आणि महापालिकेचे दुर्लक्ष होत असल्याने नागरिक संतप्त आहेत. केवळ सूचनाफलक न लावता कठोर अंमलबजावणी करण्यात यावी, अशी मागणी प्रवाशांकडून होत आहे. स्थानकावर कोणतीही जनजागृती किंवा स्वच्छता उपाययोजना न केल्यामुळे परिस्थिती आणखी बिकट झाली आहे.