रोबोटिक शस्त्रक्रियेला वाढता प्रतिसाद

रोबोटिक शस्त्रक्रियेला वाढता प्रतिसाद
१३ वर्षांत ७० टक्के वाढ
सकाळ वृत्तसेवा
मुंबई, ता. ७ ः रुग्णांमध्ये रोबोटिक शस्त्रक्रियेबाबतचा अविश्वास मागे पडत असून, आधुनिक तंत्रज्ञानाचा स्वीकार वाढू लागला आहे. गेल्या १३ वर्षांत रोबोटिक शस्त्रक्रिया स्वीकारणाऱ्या रुग्णांची संख्या तब्बल ७० टक्क्यांनी वाढल्याचे डॉक्टरांनी सांगितले.
२०१२मध्ये मुंबईसह राज्यात पहिल्यांदा रोबोटिक मशीनचा वापर सुरू झाला होता. सुरुवातीला १० पैकी केवळ दोन रुग्णच रोबोटिक पद्धतीने शस्त्रक्रिया करण्यास तयार असायचे. मात्र गेल्या काही वर्षांतील जनजागृतीमुळे आता १० पैकी ९ रुग्ण रोबोटिक शस्त्रक्रियेला प्राधान्य देत आहेत. सुरुवातीचा संदेह आणि भीती आता दूर झाल्याने रुग्णांचा रोबोटिक तंत्रज्ञानावरचा विश्वास वाढला असल्याचे गायनॅकोलॉजिकल सर्जिकल ऑन्कोलॉजी विभागाचे प्रमुख डॉ. योगेश कुलकर्णी सांगतात.

राज्यात सर्जन आणि मशीनची संख्या लक्षणीय वाढली
२०१२मध्ये केवळ एक ते दोन रुग्णालयांमध्येच रोबोटिक मशीन उपलब्ध होती. पण सध्या राज्यभरात जवळपास ४० रुग्णालयांमध्ये रोबोटिक शस्त्रक्रियेची सुविधा आहे. त्याचप्रमाणे या पद्धतीने शस्त्रक्रिया करणाऱ्या सर्जनची संख्याही पाचवरून थेट २५०–३००वर पोहोचली आहे.

शस्त्रक्रियेची पद्धत कशी असते?

असोसिएशन ऑफ गायनॅकोलॉजिकल रोबोटिक सर्जरीच्या सचिव डॉ. अंशुमाला शुक्ला-कुलकर्णी यांनी सांगितले, की जगभरात ‘द विन्सी सिस्टीम’ या रोबोटिक मशीनद्वारे उपचार केले जातात. यामध्ये तीन भाग असतात. पहिला म्हणजे सर्जन कन्सोल, जिथून डॉक्टर उपकरणे हाताने नियंत्रित करतात. दुसरा भाग म्हणजे पेशंट कार्ट, जो रुग्णाच्या स्ट्रेचरवर बसवलेला असतो आणि रोबोटला त्या माध्यमातून नियंत्रित केले जाते. तिसरा भाग व्हिजन कार्ट असतो, ज्याद्वारे डॉक्टरांना सर्जरीदरम्यान स्पष्ट दृश्य मिळते. या तंत्रामुळे वेळ आणि खर्च दोन्हींची बचत होते.